Хитойнинг Ченсян станциясида шакллантирилган поезд таркибида енгил автомобиллар учун бутловчи қисмлар, халқ хўжалиги моллари ҳамда бошқа йиғма юклар ташилмоқда.
Поезд Хоргос–Олтинкўл чегара ўтказиш пункти орқали Қозоғистон темир йўлларига қабул қилиниб, 7 сентябрь куни Олтинкўл станциясидан белгиланган йўналиш бўйлаб жўнатилди. Кейинги босқичда контейнер блок-поезди Келес чегара ўтказиш пункти орқали Ўзбекистон ҳудудига кириб, Ходжадавлет чегара станцияси орқали Туркманистонга транзит тарзида йўналтирилади.
Йўналишнинг умумий узунлиги 6 минг километрдан зиёдни ташкил этиб, блок-поезднинг якуний манзилга 14–16 кун ичида етиб бориши режалаштирилган.
Мазкур лойиҳа Хитой–Марказий Осиё–Эрон йўналишида Ўзбекистон ҳудудидан ўтувчи транспорт йўлагининг амалий самарадорлигини тасдиқлайди ҳамда ушбу йўналишда мунтазам контейнер блок-поезд қатновларини йўлга қўйиш учун мустаҳкам асос яратади.
