Огоҳлантиришга Лондондаги Қироллик коллежи касалхонасида даволанган 20 ёшли Райли Любаснинг ҳолати сабаб бўлган. У шамоллаш аломатларини енгиллаштириш учун икки хил дори қабул қилган, бироқ уларнинг иккаласи ҳам парацетамол сақлашини билмаган.
Бир неча кундан сўнг йигитда қорин оғриғи ва овқатланиш билан боғлиқ муаммолар пайдо бўлган. Кейин унинг аҳволи тезда оғирлашиб, ўткир жигар етишмовчилиги ривожланган ва бошқа аъзолар фаолияти ҳам бузилган.
Бемор интенсив терапия бўлимига ўтказилиб, ҳаётни таъминловчи аппарат ва диализга уланган. У ҳатто жигар трансплантациясини кутаётган беморлар рўйхатига киритилган. Кейинчалик жигар фаолияти тиклана бошлаган ва бир неча ҳафтадан сўнг шифокорлар уни аппаратлардан узишга муваффақ бўлган.
Мутахассислар тушунтиришича, парацетамол меъёрдан ортиқ қабул қилинганда организмда препаратнинг заҳарли парчаланиш маҳсулоти кўпайиб кетади. Оддий ҳолатда организм уни глутатион ёрдамида зарарсизлантиради. Бироқ препарат ҳаддан ташқари кўп қабул қилинса, организмдаги ушбу ҳимоя захиралари тугайди.
Натижада заҳарли метаболит жигар ҳужайраларини зарарлайди. Оғир ҳолатларда бу ўткир жигар етишмовчилигига олиб келиши мумкин. Кўп миқдорда заҳарланишда буйраклар зарарланиши, қон ивишининг бузилиши ва бошқа асоратлар ҳам кузатилиши мумкин.
Уэльс Короллик умумий амалиёт шифокорлари коллежи раиси, терапевт доктор Уилл Макинтошнинг таъкидлашича, тасодифий дозани ошириб юбориш ёшларда нисбатан кам учрайди. Бироқ бир вақтнинг ўзида таркибида парацетамол бўлган икки хил дорини қабул қилиш хавфни оширади.
Мутахассис, шунингдек, тана вазни паст бўлган беморлар ҳам хавф гуруҳига киришини қайд этган.
Шифокорлар вирусли касалликлар пайтида етарлича дам олиш муҳимлигини таъкидламоқда. Шу билан бирга, кўпчилик касал бўлишига қарамай ўқиш ёки ишлашда давом этади.
Парацетамол қабул қилаётганда эса турли дориларнинг таркибини текшириш, бир хил фаол модда бир нечта препарат орқали такроран қабул қилинмаётганига ишонч ҳосил қилиш муҳим.
