Дар солҳои охир таҳти роҳбарии Президенти кишвар ба рушди технологияҳои миллии кайҳонӣ, густариши барномаҳои моҳвораӣ ва таҳкими ҳамкории байналмилалии кайҳонӣ таваҷҷуҳи махсус зоҳир мегардад. Миссияи Samarkand-2028 яке аз натиҷаҳои амалии ин сиёсат буда, марҳилаи муҳими муаррифии имкониятҳои Ӯзбекистон дар соҳаи технологияҳои кайҳонӣ ва зеҳни сунъӣ дар арсаи байналмилалӣ ба ҳисоб меравад.

Моҳвораи Samarkand-2028 натиҷаи амалии ҳамкории стратегии байни агентии «Ӯзбеккосмос» ва ширкати STAR.VISION мебошад. Тибқи меморандум, ба ин моҳвораи гиперспектралӣ, ки аз ҷониби Чин ба фазо партоб мешавад, номи Samarkand-2028 дода шудааст. Ин ном ба ифтихори қароре интихоб гардидааст, ки дар Конгресси байналмилалии астронавтика (IAC) дар шаҳри Сиднейи Австралия оид ба баргузории конгресси соли 2028 дар шаҳри Самарқанд қабул шуда буд.

Дар доираи лоиҳа мутахассисони «Ӯзбеккосмос» барои таҷҳизоти моҳвора модули махсуси зеҳни сунъиро таҳия кардаанд. Ин модул имкон медиҳад, ки маълумоти гиперспектралӣ мустақиман дар мадор коркард шуда, самаранокии мушоҳидаи фосилавии Замин ба таври назаррас афзоиш ёбад.

Қарор аст маълумоти бадастомада дар соҳаҳои кишоварзӣ, экология, мониторинги захираҳои табиӣ ва дигар самтҳо истифода шавад.
Айни ҳол мушак дар киштии стартӣ ҷойгир карда шуда, ба сӯи минтақаи партоб равона шудааст. Ҳамаи корҳои омодагӣ тибқи нақшаи муқарраршуда идома доранд.