Дар ин рӯзҳо дар кишвари мо санаи муҳим — 690-солагии Амир Темур ба таври васеъ ҷашн гирифта мешавад. Ба муносибати ин ҷашн дар саросари ҷумҳурӣ чорабиниҳои зиёди маънавию маърифатӣ, илмӣ ва фарҳангӣ баргузор мегарданд.
Амир Темур арбоби бузурги таърихист, ки дар асри XIV, дар як давраи бисёр душвор давлатдории миллиро дар қаламрави кишвари мо барқарор намуда, дар мубориза барои озодии Ватан ҷасорати беандоза нишон дод. Давлати пурқудрате, ки ӯ бунёд гузошт, дар таърихи тамаддуни ҷаҳонӣ нақши фаромӯшнашаванда гузоштааст. Ҳатто пас аз ҳафт аср олимони ҷаҳон бо шавқи зиёд ҳаёт ва фаъолияти Соҳибқиронро меомӯзанд. Он ки дар кишварҳои гуногун ҳазорон асарҳои бадеӣ, илмӣ ва фарҳангӣ бахшида ба Амир Темур ва давраи Темуриён офарида шудаанд, аз аҳамияти бузурги шахсият ва мероси ӯ шаҳодат медиҳад.
Ҳамватанони мо ҳисси ифтихор ва қаноатмандӣ эҳсос мекунанд, ки чунин арбоби бузург, ба мисли Амир Темур дар сарзамини муқаддаси мо ба дунё омадааст. Омӯзиши амиқи таърих ва мероси Амир Темур ва давраи Темуриён имрӯз, махсусан дар шароити Ӯзбекистони Нав, аҳамияти хоса дорад. Эҳёи Темуриён, ки аз ҷониби ин сулола ба вуҷуд омадааст, барои мардуми мо манбаи илҳом ва нерӯи созанда дар роҳи бунёди давраи нави эҳё гардид.
Ибораҳои пурҳикмати Амир Темур, аз ҷумла «Қудрат дар адолат аст» ва «Адолат ҷаҳонро обод мекунад», имрӯз ҳамчун дастури амал барои татбиқи ислоҳоти васеъ дар роҳи бунёди давлати иҷтимоӣ ва баланд бардоштани қадри инсон хизмат мекунанд. Аз ин рӯ, мероси Соҳибқирон на танҳо бахше аз гузаштаи пуршарафи мост, балки бо рушди имрӯза ва ҳадафҳои стратегии мо пайванди ногусастанӣ дорад.
Дар солҳои охир дар кишвар ба омӯзиши амиқи мероси Амир Темур ва давраи Темуриён, инчунин таблиғи он дар дохил ва хориҷ таваҷҷуҳи махсус дода мешавад. Ба ин муносибат бахшида ба 690-солагии Амир Темур қарори махсус қабул гардида, корҳои васеъ анҷом дода мешаванд.
Аз ҷумла, ҳар сол моҳи апрел ҳамчун моҳи Амир Темур таҷлил мегардад. Китобҳои нави илмӣ ва бадеӣ, филмҳо, намоишномаҳо ва асарҳои санъати тасвирӣ офарида мешаванд. Аз ҷумла, асари машҳури «Тузукоти Темур» аз нав нашр гардид. Дар кишвар ҷоизаҳои давлатӣ, майдонҳо ва хиёбонҳо, муассисаҳои таълимӣ ва фарҳангие мавҷуданд, ки номи ин аҷдоди бузургро доранд. Мактабҳои «Темурбеклар мактаби» дар тарбияи ҷавонон дар рӯҳияи ватандӯстӣ нақши муҳим мебозанд.
Намунаи равшани идомаи пайдарпай ва низомноки ин кори наҷиб ҳамон аст, ки дар ин рӯзҳо дар пойтахт конфронси байналмилалии бонуфуз бахшида ба Амир Темур ва давраи Эҳёи Темуриён баргузор мегардад.
Дар баробари олимони кишвари мо, дар он таърихшиносони маъруф, шоирон ва нависандагон, инчунин намояндагони фарҳанг ва ҷомеа аз кишварҳои гуногуни ҷаҳон иштирок мекунанд.
Бо пайравӣ аз таълимоти Соҳибқирон, имрӯз дар кишвари мо ба бунёди давлати одилона, расонидани кӯмак ба ниёзмандон, дастгирии ҷавонон, занон ва намояндагони насли калонсол, рушди илм ва маориф, пуштибонии созандагӣ, кушодагӣ ба ҷаҳон ва ҳамкорӣ бо кишварҳои гуногун диққати калон дода мешавад. Ин ҷанбаҳо ҳамчунин аҳамияти мубрами мероси Амир Темурро дар ҳаёти имрӯзаи мо равшан нишон медиҳанд.
Барои дарки ҳувияти миллӣ, барқарор намудани таърихи ғанӣ ва ба наслҳои оянда интиқол додани мероси аҷдодон, дар солҳои охир марказҳои бузурги маънавию маърифатӣ бунёд шудаанд. Дар Тошканд Маркази тамаддуни исломӣ сохта шудааст, дар Самарқанд бошад, маҷмааи Имоми Бухорӣ бунёд гардидааст. Ҳамзамон, Осорхонаи давлатии таърихи Темуриён, ки 30 сол пеш сохта шуда буд, мутобиқ ба талаботи муосир азнавсозӣ гардид. Ҳоло ин макон ба маркази илм ва маориф, навовариҳо, идеяҳои нав ва таҳқиқот табдил меёбад. Дар ин ҷо тамоми шароити зарурӣ барои тарбияи насли ҷавон дар рӯҳияи ифтихори миллӣ ва ватандӯстӣ фароҳам оварда шудааст.
Дар ҷараёни чорабинӣ ба хотираи Амир Темур эҳтироми амиқ гузошта шуда, ба пояи муҷассамаи ӯ гулҳо гузошта шуданд.
Тавре маълум аст, Соҳибқирон Амир Темур, дар куҷое ки қарор дошт, ба бунёди боғҳо ва хиёбонҳо, инчунин ободонии шаҳрҳо аҳамияти калон медод. Дар идомаи ин анъанаҳои созанда, дар хиёбони Амир Темур низ корҳои васеи ободонӣ анҷом дода шуданд.
Дар анҷоми чорабинӣ Президент Шавкат Мирзиёев дар хиёбон дарахт шинонд.
