Дар соли ҷорӣ ду қарор қабул гардид, ки ба такмили фаъолияти ҶС «Ӯзбекнефтегаз» ва ҳалли масъалаҳои вобаста ба харид ва истеҳсолот равона шудаанд.

Зимни муаррифӣ иҷрои ин қарорҳо, нишондиҳандаҳои истихроҷи гази табиӣ ва чорабиниҳои барои то охири сол пешбинишуда баррасӣ шуданд.

Бо мақсади зиёд намудани захираҳои газ корҳои иктишофи геологӣ васеъ карда мешаванд. Аз ҷумла, дар соли ҷорӣ ҳаҷми корҳои сейсморазведкаи сеандоза дар муқоиса бо соли гузашта панҷ баробар зиёд карда мешавад. Аз аввали сол то имрӯз панҷ кони нави газ кашф гардида, дар минтақаҳо 80 чоҳ, аз ҷумла чоҳҳои чуқур, ки умқи онҳо ба 6 ҳазор метр ва бештар мерасад, парма карда шудааст. Дар семоҳаи чорум парма кардани боз 40 чоҳ ба нақша гирифта шудааст.

Нақшаҳои омӯзиши қитъаҳои ояндадори дорои захираҳои нафту газ, пеш аз ҳама қабатҳои амиқҷойгиршудаи Устюрт, азхудкунии конҳои нав ва баланд бардоштани самаранокии чоҳҳои амалкунанда пешниҳод гардиданд.

Барои ҳалли ин вазифаҳо ба сатҳи нав баровардани корҳои пармакунӣ ва татбиқи қарорҳои муосири технологӣ муҳим мебошад.

Ҳоло дар Устюрт як қатор лоиҳаҳо дар ҳамкорӣ бо шарикони хориҷӣ оид ба пармакунии чоҳҳои нав, таҳлили такрории маълумоти геофизикӣ ва баланд бардоштани самаранокии истихроҷи газ амалӣ мешаванд.

Дар муаррифӣ инчунин натиҷаҳои молиявии ҶС «Ӯзбекнефтегаз» ва корхонаҳои бузурги он таҳлил гардиданд. Аз рӯи натиҷаҳои нӯҳ моҳи соли ҷорӣ фоидаи софи умумии онҳо нисбат ба ҳамин давраи соли гузашта афзоиш ёфтааст. Оптимизатсияи портфели қарзӣ имкон дод, ки ҳаҷми қарздорӣ коҳиш дода шавад. Ҳамзамон, бознигарии шартҳои қарзҳои дорои фоизҳои баланд боиси кам шудани хароҷоти хидматрасонии онҳо гардид.

Ба лоиҳаҳои зиёд намудани иқтидори интиқолии низоми интиқоли газ таваҷҷуҳи алоҳида зоҳир карда шуд. Ин лоиҳаҳо сохтмони қубурҳои нави магистралии газ ва навсозии истгоҳҳои компрессориро дар бар мегиранд.

Амалӣ намудани ин лоиҳаҳо, аз ҷумла истифодаи муҳаррикҳои муосири барқӣ дар баъзе истгоҳҳо, имкон медиҳад устувории интиқоли газ баланд бардошта, ҳамасола то 125 миллион метри мукааб гази табиӣ сарфа карда шавад. Пешниҳодҳо оид ба манбаъҳои маблағгузории ин лоиҳаҳо низ баррасӣ шуданд.

Дар муаррифӣ инчунин ба корҳои бартарафсозии садама дар кони «25-солагии Истиқлолият» таваҷҷуҳи алоҳида зоҳир гардид. Барои анҷом додани ин корҳо як ширкати махсусгардонидашудаи чинӣ ҷалб шудааст. Ҳоло ба маҳалли ҳодиса техника ва таҷҳизоти махсус интиқол дода шуда, барои пармакунии чоҳҳо майдонҳо омода карда мешаванд.

Таъкид гардид, ки дар тамоми марҳилаҳои бартарафсозии садама риояи қатъии талаботи бехатарӣ аҳамияти аввалиндараҷа дорад.

Ҳамчунин оид ба корҳои зиёд намудани ҳаҷми истеҳсолот ва солимгардонии вазъи молиявии Заводи коркарди нафту гази Фарғона маълумот пешниҳод гардид.

Дар натиҷаи таъмири дастгоҳҳои асосии технологӣ истеҳсоли сӯзишвории дизелӣ дар завод 30 фоиз, битум 60 фоиз ва керосини авиатсионӣ панҷ баробар зиёд шудааст.

Барои бо ашёи хом ба таври устувор таъмин намудани завод, самаранок истифода бурдани иқтидорҳои мавҷуда ва коҳиш додани қарздорӣ чораҳои маҷмӯӣ андешида мешаванд. То охири сол ба нақша гирифта шудааст, ки сатҳи истифодаи иқтидорҳои завод аз 40 ба 65 фоиз расонида шуда, минбаъд боз ҳам зиёд карда шавад.

Сарвари давлат ба масъулон оид ба баланд бардоштани самаранокии корҳои иктишофи геологӣ ва пармакунӣ, татбиқи лоиҳаҳои бузург дар асоси ҳисобҳои дақиқ ва муайян намудани манбаъҳои маблағгузорӣ, инчунин баланд бардоштани самаранокии фаъолияти корхонаҳои соҳа дастурҳои дахлдор дод.