Дар маросим ҳокими вилояти Фарғона Ҳайрулло Бозоров, соҳибкорону
сармоягузорон, намояндагони ҷомеа ва собиқадорон иштирок карданд.
Ҳокими вилоят зимни суханронӣ иштирокдоронро ба
муносибати 35-солагии истиқлолияти давлатии Ӯзбекистон табрик гуфт. Ӯ таъкид
кард, ки ислоҳоти васеъмиқёсе, ки дар кишвар амалӣ мешаванд, дар тамоми соҳаҳо,
аз ҷумла дар ноҳияи Ёзёвон, татбиқи амалии худро пайдо мекунанд. Дар ноҳия як қатор
лоиҳаҳои бузурги созандагӣ амалӣ шуда истодаанд.
Ба рушди нақлиёти аз ҷиҳати экологӣ тоза ва васеъ
намудани истифодаи манбаъҳои алтернативии энергия таваҷҷуҳи махсус зоҳир
гардид. Таъкид шуд, ки лоиҳаи нав дар Ёзёвон яке аз қадамҳои амалии татбиқи ин
самт хоҳад буд. Дар марҳилаи аввал истеҳсоли электробусҳо ба роҳ монда шуда,
дар оянда истеҳсоли мошинҳои боркаши барқӣ низ ба нақша гирифта шудааст.
Лоиҳа дар ҳудуди минтақаи махсуси саноатӣ дар маҳаллаи
«Ижодкор» дар масоҳати 10 гектар амалӣ мешавад. Арзиши умумии лоиҳа 170 миллион
доллари ИМА-ро ташкил медиҳад.
Дар доираи лоиҳа корхонае таъсис дода мешавад, ки иқтидори
истеҳсоли 700 электробус дар як солро хоҳад дошт. Ба истифода додани корхона моҳи декабри соли
2027 ба нақша гирифта шудааст. Маҳсулоти истеҳсолшуда ба бозори дохилӣ пешниҳод
шуда, ба кишварҳои хориҷӣ низ содир хоҳад шуд.
Татбиқи лоиҳа ба
баланд бардоштани иқтидори саноатии вилояти Фарғона, васеъ намудани истеҳсоли
техникаи муосир ва аз ҷиҳати экологӣ тоза, инчунин таъсиси ҷойҳои нави корӣ
мусоидат мекунад.
Дар чорабинӣ ҳамчунин
шоир Уктамхон Солиева, дорандаи ордени «Соғлом авлод учун» дараҷаи II, суханронӣ
кард. Ӯ аз номи фаъолони ноҳия ва намояндагони насли калонсол ба Президенти Ӯзбекистон
барои ислоҳоти амалӣ ва фароҳам овардани имкониятҳои нав изҳори сипос намуд.
Дар анҷом
маросими гузоштани санги аввал ба таҳкурсии корхонаи оянда баргузор шуда, баъд
аз он корҳои сохтмонӣ расман оғоз гардиданд.
