Дар чорабинӣ дар баробари сарони ҳайатҳои давлатҳои узви
СҲШ ва роҳбарони мақомоти доимамалкунандаи он, инчунин сарони кишварҳои нозир
ва шарик, меҳмонони фахрӣ, Дабири кулли Созмони Милали Муттаҳид Антониу
Гутерриш ва шахсони олимақоми дигар созмонҳои байналмилалӣ иштирок карданд.
Дар суханронии худ сарвари Ӯзбекистон ба нақши СММ ва
созмонҳои минтақавӣ дар шароити тағйироти дар ҷаҳон баамаломада таваҷҷуҳ кард.
– Муҳим аст муайян намоем, ки давлатҳо ва иттиҳодияҳои
минтақавӣ чӣ гуна метавонанд ба ниҳодҳои ҷаҳонӣ барои самараноктар иҷро
намудани рисолати умумиҷаҳонии онҳо мусоидат кунанд, – таъкид кард роҳбари
кишвари мо.
Тибқи дидгоҳи баёншуда, СММ бояд нақши марказӣ ва ҳамоҳангсозии
худро нигоҳ дорад, дар ҳоле ки сохторҳои минтақавӣ бояд талошҳои онро пурра
намуда, дар татбиқи амалии принсипҳо ва қарорҳои умумӣ бо такя ба шароити маҳаллӣ,
ниёзҳо ва имкониятҳо мусоидат кунанд.
Дар ин мантиқ, формати «СҲШ плюс» ба шарофати қобилияти
муттаҳид намудани давлатҳо, минтақаҳо ва созмонҳо дар атрофи рӯзномаи муштарак,
инчунин пешбурди муколама оид ба ҳамоҳангсозии ташаббусҳои гуногун ва ташаккули
меъмории идоракунии ҷаҳонӣ, аҳамияти махсус пайдо мекунад.
Тавре таъкид гардид, Ӯзбекистон ба рушди ҳамкории боз ва
мутақобилан судманд дар фазои Авруосиё содиқ аст.
– Барои мо пайвастагии байниҳамдигарӣ масъалаи истиқлолияти
стратегӣ ва устуворӣ мебошад. Мо ҷонибдори чунин бисёрқутбият ҳастем, ки хатҳои
нави ҷудоикунандаро ба вуҷуд намеорад, балки фазои имкониятҳоро васеъ мекунад,
ки дар он лоиҳаҳо ва ташаббусҳои минтақавӣ бо ҳам рақобат накарда, балки
якдигарро самаранок пурра менамоянд, – изҳор дошт роҳбари кишвари мо.
Бо назардошти рӯзномаи мулоқот як қатор пешниҳодҳои
ояндадор пешбарӣ гардиданд.
Пеш аз ҳама, рушди формати «СҲШ плюс» ҳамчун платформаи
муколамаи байни минтақавӣ оид ба масъалаҳои рушди устувор, татбиқи технологияҳои
пешрафта, мутобиқшавӣ ба тағйирёбии иқлим, рушди сармояи инсонӣ, таҳсилоти
дастрас ва дастгирии ҷавонон пешниҳод гардид.
Бо мақсади табодули таҷриба, ҳамоҳангсозии равишҳо ва
пешбурди муштараки қарорҳо дар доираи СММ, «СҲШ плюс» метавонад ҳамчун
платформа барои таъсиси Шабакаи шарикии созмонҳои минтақавӣ баромад кунад.
Дар байни вазифаҳои аввалиндараҷа истифодаи фаъоли иқтидори
созмонҳои минтақавӣ барои ноил шудан ба Ҳадафҳои рушди устувори СММ қарор
дорад.
Ҳамчун механизми татбиқи ин ҳадаф пешниҳод гардид, ки
Бонки кушодаи лоиҳаҳо ва технологияҳои байниминтақавӣ дар соҳаҳои истифодаи
захираҳои табиӣ, энергетикаи «сабз», хизматрасониҳои рақамӣ ва тандурустӣ
таъсис дода шавад.
Ба густариши ҳамкории васеи иқтисодӣ таваҷҷуҳи махсус зоҳир
гардид.
– Соҳибкорон бояд дар ҳама ҷо натиҷаҳои воқеиро эҳсос
кунанд – дар шакли содда шудани расмиёти дастрасӣ ба бозорҳо, ба роҳ мондани
долонҳои фаромарзӣ ва воридшавии сармоягузориҳои мустақим, – таъкид кард
Президент.
Бо таваҷҷуҳ ба чунин нишондиҳандаҳои мушаххаси самаранокӣ
ташаббус пешниҳод гардид, ки ба форуми «СҲШ Инвест» мақоми платформаи
доимоамалкунанда дода шавад.
Бо мақсади рушди таҷрибаи нодири ҷамъшудаи ҳамкории
давлатҳое, ки низомҳои гуногуни сиёсӣ, анъанаҳои фарҳангӣ ва дидгоҳҳои мухталиф
ба равандҳои байналмилалӣ доранд, пешниҳод шуд, ки Форуми доимии фарҳангҳо ва
тамаддунҳои «СҲШ плюс» таъсис дода шуда, ин чорабинӣ дар шаҳри Хива – яке аз қадимтарин
марказҳои илму маърифат баргузор карда шавад.
Дар анҷоми суханронии худ сарвари давлати мо таъкид
намуд, ки формати «СҲШ плюс» платформаи мутобиқ ба талаботи замон мебошад. Ҳар қадар
нуқтаҳои умумии миёни кишварҳо ва минтақаҳо зиёд бошанд, ҳамон қадар замина
барои субот ва эътимоди мутақобила мустаҳкамтар мегардад.
