Мемлекет басшысының 2024 жыл 2 желтоқсанда қабылданған қаулысына сәйкес, Наманган облысын әлеуметтік-экономикалық тұрғыдан дамыту, инвестициялық және кәсіпкерлік ортаны жақсарту бойынша нақты міндеттер қойылған еді. Атап айтқанда, биыл 4,2 миллиард доллар инвестиция тарту, 1 миллиард долларлық экспортты қамтамасыз ету, 323 мың жұмыс орнын ашу, 55 мың отбасын кедейліктен шығару жоспарланған.
Бұл көрсеткіштерге жетуде негізгі тірек – шағын бизнес пен кәсіпкерлік. Наманганда еңбекке қабілетті халықтың 82 пайызы осы салада жұмыс істеп жүр.
Жыл басынан бері облысқа шамамен 1,6 миллиард доллар инвестиция салынған. Бірақ бұл қаржының басым бөлігі Наманган қаласы мен орталық аудандарға тиесілі. Енді «Мингбулоқ», «Норин», «Уйчи» және «Чортоқ» аудандарына да инвестиция тартуды көбейту керек. Экспорт бағытында да өнім түрлерін көбейтіп, шалғай аудандардың әлеуетін арттыру қажет.
Облыста ауыл шаруашылығында да мол өнім алынып отыр. Мысалы, «Янгикурғон» ауданында бір гектардан 20 мың доллардан жоғары табыс алынған.
Осындай мүмкіндіктерді толық пайдалану үшін Президенттің бастамасымен аймақтарда әкімшілік және экономикалық реформалар жүргізілуде. Наманганда да мамандар, үздік кәсіпкерлер және шетелдік сарапшылардан құралған «Реформа штабы» жұмысын бастады. Олардың ізденісі нәтижесінде қосымша 1 миллиард долларлық жобалар дайындалған.
Жиында жауапты басшылар осы жаңа мүмкіндіктер бойынша таныстырылым өткізді. Айтылғандай, бұл жобалар арқылы 12 мың жұмыс орны ашылып, бюджетке қосымша 200 миллиард сум түсіп, 160 миллион долларлық экспорт жүзеге асады.
Мысалы, «Норин» ауданында халық үйлерінде балық өсіру, «Мингбулоқта» үйрек шаруашылығын дамыту жоспарланған. Бұл жобалар азық-түлік молшылығын қамтамасыз етіп, көптеген жұмыс орнын ашады. Президент бұл тәжірибені басқа аймақтарда да қолдану қажет екенін айтты.
Қазіргі кезде облыста 55 мың жұмыссыз адам және 44 мың кедей отбасы бар. Оларды кәсіпке баулып, табыс табуына көмектесу, өз үйінде табыс көзіне ие болуына жағдай жасау міндеті жүктелді. Сонымен қатар, әлеуметтік жағдайды жақсарту, махаллаларды қылмыссыз аймаққа айналдыру бойынша тапсырмалар берілді.
