Жиында еліміздің геология жүйесін заманауи ғылыми және технологиялық негізде дамыту, пайдалы қазбалар бойынша ресурстық базаны кеңейту, сондай-ақ минералдық шикізатты терең қайта өңдеуді қамтамасыз ету ең өзекті міндеттердің бірі екені атап өтілді.
Әлемдік тәжірибе көрсетіп отырғандай, геологиялық барлау жұмыстары күрделі саналатын өңірлердің өзінде жасанды интеллект көмегімен жаңа кен орындарын анықтау мүмкіндігі бар. Бұл бағытта аймақтық зерттеулерді кеңейту және заманауи геофизикалық әдістерді қолдану тиімді нәтиже береді.
Осы мақсатта сала мамандары халықаралық серіктестермен, соның ішінде кен және геология саласында алдыңғы қатарда тұрған АҚШ-тың Колорадо тау-кен мектебімен бірлесіп, ғылыми-зерттеу мен тәжірибелік әзірлемелерді біріктіретін заманауи Компетенциялар орталығын құру жобасы туралы ақпарат берді.
Аталған орталықтың басты міндеттері барлау жұмыстарына цифрлық шешімдер, жасанды интеллект және аэро-геофизикалық технологияларды енгізу. Халықаралық тәжірибеге сүйене отырып, деректерді цифрлық талдау, геохимиялық және ғарыштық-геологиялық зерттеу нәтижелерін біріктіру, сондай-ақ перспективалы кен орындарын анықтау үдерісін жеделдету көзделген.
Мемлекет басшысы ұсыныстарды қолдап, салада халықаралық ынтымақтастықты күшейту, заманауи технологияларды кеңінен енгізу, сондай-ақ болашағы зор кен орындарын анықтау мен игеру жұмыстарын тиімді ұйымдастыру жөнінде бірқатар нақты тапсырмалар берді.
