Өсіп келе жатқан халық саны мен экономикалық салалардың энергияға деген сұранысын қанағаттандыру үшін елде энергияның барлық көздері пайдаланылуда. Соңғы жылдары 4 гигаваттық баламалы қуат көздері іске қосылып, «жасыл» энергияның үлесі 16 пайызға жетті.
Алдағы 5 жылда тағы 25 гигаваттық жаңартылатын энергия көздерін іске қосу жоспарланған. Осы арқылы жылына 64 миллиард киловатт-сағат «жасыл» энергия өндіру көзделіп отыр. Жалпы, 2030 жылға қарай елдегі энергия генерациясында «жасыл энергияның» үлесін 50 пайыздан асыру басты мақсат болып белгіленді.
Қазіргі уақытта цифрлық технологиялар, электромобильдер, жасанды интеллект және майнинг индустриясы қарқынды дамып, энергияға деген сұранысты күрт арттыруда. Көптеген мемлекеттер жаңа энергия көздеріне көшу жолдарын қарастыруда. Жер қойнауынан өндірілетін отын түрлері өз орнын жаңартылатын энергия көздеріне босатып беруде. Бүгінгі таңда әлемдегі жалпы энергия генерациясының 42 пайызы баламалы энергия көздеріне тиесілі.
Ұзақ мерзімді энергия көздерін дамытуда атом энергетикасы тиімді шешімдердің бірі. Қазіргі таңда әлемде 417 атом реакторы жұмыс істеп, олардың жалпы қуаты 375 гигаваттты құрайды. Жаңа атом станциялары салынып, бірқатар мемлекеттер атом энергетикасын өздерінің даму стратегиясына енгізуде.
Өзбекстанда уран қорының мол болуы ескеріле отырып, ұзақ мерзімді энергетикалық қуат көзін құру жоспарланып отыр. Атап айтқанда, шағын қуатты реакторлар салу жобасы әзірленді. 2024 жылдың 5 желтоқсанында Самарқанд қаласында атом энергиясын пайдалану мәселелері бойынша халықаралық конференция өтті.
Жиында жауапты тұлғалар атом энергетикасын дамыту бойынша атқарылып жатқан жұмыстар туралы есеп берді.
Мемлекет басшысы болашақ атом станциялары мен энергетикалық жүйелерде жұмыс істейтін мамандарды қазірден бастап даярлау, қауіпсіздікті Халықаралық атом энергиясы агенттігінің талаптарына сәйкес қамтамасыз ету бойынша нақты тапсырмалар берді. Мұндай жоғары технологиялар ел экономикасының бәсекеге қабілеттілігін арттырып, ұзақ мерзімді тұрақты дамуға негіз болатыны ерекше атап өтілді.
