Мемлекет басшысы өзбекстандықтарды және күллі мұсылман қауымын қасиетті Рамазан айымен шын жүректен құттықтады.
«Осы шарапатты айда халқымызбен бірге осындай берекелі ауызашар басында бас қосуға жазғаны үшін мейірімді және құдіретті Алла Тағалаға шүкірлік етеміз», – деді Президент.
Бүгінде Өзбекстанда «Адам қадірі үшін, адам бақыты үшін» деген ізгі ұстаным барлық салаларда басты бағдарға айналып отыр. Азаматтардың діни сенімі мен ар-ождан бостандығы қамтамасыз етіліп, қасиетті Рамазан айында қоғамда сабырлық, мейірімділік, кешірім, білімге құштарлық, рухани тәрбие секілді ізгі қасиеттер күшейіп келе жатыр.
Ислам дінінің гуманистік мәнін терең зерттеу, бабалардан қалған рухани-ғылыми мұраны жинақтап, кеңінен насихаттау жұмыстарына ерекше назар аударылуда. Осы мақсатта Ташкент қаласында Ислам өркениеті орталығы салынуда. Бұл ауқымды ғылыми-ағартушылық жоба мыңжылдықтар бойғы ислам өркениетінің Өзбекстан жерінде ғылым, білім, мәдениет пен тәрбие арқылы дамығанын дәлелдейді. Сондай-ақ, бұл орталық жас буынды ұлы ізденістер мен жаңалықтарға рухтандыратын ірі жобалардың біріне айналмақ.
Сонымен қатар, Самарқанд қаласында хадис ілімінің сұлтаны саналатын Имам Бухари кешенінің құрылысы қарқынды жүргізіліп жатыр. Бұл кешенде 10 мың адамға арналған мешітпен қатар, ғалымның өмірі мен қызметіне арналған мұражай мен ғылыми орталықтар ашылады. Бұл қос зәулім ғимаратты осы жылы пайдалануға беру жоспарланған.
Президент 2024 жылдың 14 наурызындағы қаулысына сәйкес, биыл Имам Матуриди бабамыздың туғанына 1155 жыл толуы кең көлемде аталып өтеді. Ұлы ғалымның Самарқандтағы қасиетті кесенесі абаттандырылып, оның ғылыми мұрасы мен матуридия ілімі шетелдік ғалымдармен бірлесе отырып тереңірек зерттеледі.
Өзбекстанда ұлтаралық татулық пен дінаралық келісімді нығайту мақсатында биыл қыркүйек айында Ташкент пен Самарқанд қалаларында «Декларациялар диалогы форумы» атты халықаралық жиын өтеді. Бұл форум — түрлі діни сенім өкілдерінің арасындағы ағартушылық және бейбіт үнқатысу алаңы ретінде қызмет атқарады.
Конституцияға сәйкес, Өзбекстан — әлеуметтік мемлекет. Елде халыққа жақын және гуманистік саясат жүргізілуде. Атап айтқанда, өткен жылдың өзінде көмекке мұқтаж азаматтарға 16 триллион сум көлемінде материалдық жәрдем мен жәрдемақылар берілген. Сондай-ақ, жағдайы төмен отбасылардан шыққан 51 мың бала балабақшаларға орналастырылып, олардың 176 мың отбасы мүшесі медициналық көмекпен, 182 мың адам әлеуметтік қызметтермен қамтылды.
«Саховат ва кумак» қоры арқылы 94 мыңнан астам табысы аз отбасының емделу, азық-түлік, киім-кешек және коммуналдық төлемдерге байланысты 130 миллиард сумдық шығындары өтелді.
«Әйелдер дәптері» жобасы аясында 3,5 миллион әйелге 5 триллион 700 миллиард сум көлемінде көмек көрсетілсе, «Жастар дәптері» арқылы 1 миллион 300 мың мұқтаж жасқа 1 триллион 700 миллиард сумдық әлеуметтік қолдау жасалған.
Бұдан бөлек, елдегі қажылардың бастамасымен күн көрісі төмен, асыраушысынан айырылған және мұқтаж отбасыларға 6 миллиард 300 миллион сум мөлшерінде материалдық көмек берілген.
Сондай-ақ, елді көркейтіп, ағаш егіп, бақ өсіру — сауапты іс саналады. Осы мақсатта жүзеге асырылып жатқан «Жасыл мекен» жалпыұлттық жобасы аясында көктем мезгілінің өзінде ғана дін қызметкерлері тарапынан 10 мыңнан астам ағаш, 32 мың түпке жуық гүл егілді. Сонымен қатар, мешіттер мен зиярат орындарының айналасы абаттандырылып, экологиялық орта жақсартылды.
«Қоршаған ортаны қорғау және «жасыл» экономика жылы» мемлекеттік бағдарламасы аясында табиғатты қорғау жұмыстары кеңейіп келеді. Жақында Хиуа қаласында өткен Конфессияаралық кеңестің отырысында елдегі түрлі діни конфессиялар өкілдері аталмыш бағдарламаға белсенді қатысу жөнінде арнайы үндеу қабылдады.
Ташкентте өткен ауызашар рәсіміне шетел елшілері, халықаралық ұйымдар мен діни конфессиялар өкілдерінің қатысуы — елдегі толеранттылық пен бейбіт өмірдің айқын көрінісі болды.
Мемлекет басшысы өз сөзінде әлемдегі жағдайға да назар аударды. Көптеген қақтығыстар мен жанжалдар ислам әлемінде орын алып жатқанына алаңдаушылық білдірілді.
Шиеленіс ошақтары кез келген сәтте кеңейіп кетуі мүмкін. Сондықтан мұсылман елдерінде бейбітшілік пен тұрақтылықты сақтау, сондай-ақ ислам үмбетінің бірлігі мен ынтымағын нығайту — қазіргі күннің ең өзекті мәселелерінің бірі екені айтылды.
Бұл мақсатқа жету үшін, ең алдымен, жастарды жат идеология мен теріс ағымдардың ықпалынан сақтау, оларды білім мен рухани тәрбиеге бағыттау аса маңызды екені атап өтілді.
Осы туралы айта келе, Президент Шавкат Мирзиёев ұлы ғұлама Баһауддин Нақшбандидің «Қолыңыз еңбекте, жүрегіңіз Аллада болсын» деген өсиетін еске салды. Мемлекет басшысы жастарды дәл осы рухта тәрбиелеу, оларды адал еңбекке, кәсіби шеберлікке баулу – бүгінгі күннің басты міндеттерінің бірі екенін атап өтті.
Қазіргі таңда «Рамазан – мейірім, бірлік және кеңпейілділік айы» ұраны аясында еліміздегі 9500-ге жуық махаллада аз қамтылған отбасылар үшін ауызашар дастархандары жайылып, олардың хал-ахуалына назар аударылып отыр. Мұндай сауапты істер – адам қадірін ардақтау жолындағы игі қадам ғана емес, сонымен бірге пәк ниетті барша азаматтарды бірлесуге жетелейді.
– Ұлы Әлішер Науаи бабамыз айтқандай, «Жақсылардың ісі – жақсылық жасау». Шынымен де, бұл өмір – ізгілік пен жақсылық арқылы ғана жарық әрі тұрақты, – деді Шавкат Мирзиёев.
Ниеттер қабыл болатын қасиетті Рамазан айында, Қадір түні қарсаңында ізгі тілектер айтылды.
Құран Кәрімнен аяттар оқылды. Алла Тағаладан бүкіл әлемге тыныштық, елімізге береке-бірлік пен мейірімнің тұрақтауы тіленіп, дұғалар жасалды.
Еліміздің барлық аймақтарында өткен ауызашар шарасына ақсақалдар мен зиялы қауым өкілдері, түрлі дін мен конфессиялар мүшелері, мүмкіндігі шектеулі жандар мен мұқтаж азаматтар қатысып, жалпы 60 мыңға жуық азамат қатысты.
