Науаи тау-кен-металлургия комбинаты, Алмалық тау-кен металлургия комбинаты, Өзбекстан металлургия комбинаты және «Науаиуран» мемлекеттік кәсіпорны республиканың экономикасында үлкен орын алады. Соңғы жылдары бұл төрт кәсіпорынға 7 миллиард 400 миллион доллар инвестиция құйылған. Нәтижесінде алтын өндіру 23 пайызға, мыс 41 пайызға, күміс 60 пайызға өсті. Науаи комбинатында жаңа шахталар игеріліп, 3 зауыт іске қосылды. Өндіріс «Узметкомбинат» және «Науаиуранда» да артты.
Жалпы, кейінгі 6 жылда бұл кәсіпорындардың жалпы өнеркәсіптегі үлесі 10 пайыздан 17 пайызға, ал бюджет кірістеріндегі 11 пайыздан 25 пайызға дейін өсті.
2030 жылға дейін Өзбекстан экономикасының көлемін екі есеге ұлғайту көзделгені белгілі. Сонымен қатар, әлемде күшейіп келе жатқан бәсекелестік жаңа міндеттер қойып отыр. Бұл жағдайда осы төрт ірі компанияның тиімділігін арттыру өзекті мәселе болып табылады.
Бүгінгі презентацияда шенеуніктер өндірісті одан әрі ұлғайту және инвестиция тарту жөніндегі жоспарларын баяндады.
Мемлекет басшысы шетелдік сарапшыларды тартып, «жасыл» технологияларға баса назар аудара отырып, зауыттарды цифрлық түрлендіру қажеттігін атап өтті. Инвестицияларды игеру және жаңа жобаларды жеделдету бойынша нақты тапсырмалар берілді.
Өндірісте операциялық шығындар мен энергияны тұтынуды оңтайландыру арқылы шығындарды азайту бойынша міндеттер қойылды. Сондай-ақ зауыттардағы еңбек өнімділігін арттырудың, басшылар мен мамандардың қызметіне тиімділік көрсеткіштерін (KPI) енгізудің маңыздылығы атап өтілді.
