Бүгін, 10 октябрь күні Чехия Үкіметі үйінде Өзбекстан Республикасы үкіметі делегациясын ресми қарсы алу рәсімінен кейін Премьер-министр Абдулла Арипов пен Чехия Республикасының Премьер-министрі Петр Фиала басшылығындағы екі елдің үкімет делегацияларының кездесуі өтті.
Чехия Премьер-министрі Петр Фиала елімізде Президент Шавкат Мирзияевтың басшылығымен барлық салада жүргізіліп жатқан реформаларды құптайтынын мәлімдеді.
Расында да, соңғы жылдары елімізде Президент Шавкат Мирзияевтың басшылығымен экономиканы ырықтандыру, базар механизмдерін нығайту, банк саласын дамыту, жекешелендіруді кеңейту, құқықтық қорғауды күшейту, сыбайлас жемқорлықпен күресу бағытында елеулі жұмыстар атқарылуда.
Өз кезегінде, ортақ мақсаттар, әрине Өзбекстандағы оң өзгерістер шетелдік, сонымен қатар чехиялық серіктестер үшін еліміздің тартымдылығын арттырады. Ағымдағы жылдың 24-25 апрель күндері Чехия Премьер-Министрі басшылығындағы делегацияның елімізге сапары аясында қол жеткізілген келісімдер осыны растайды.
Кездесуде елдеріміз арасындағы сауда-экономикалық және инвестициялық ынтымақтастықты дамытуға қатысты істердің жай-күйі мен алдағы міндеттер қаралды.
Бүгінде Өзбекстанда Чехия капиталының қатысуымен 50-ге жуық кәсіпорын жұмыс істейді. Өнеркәсіптік кооперацияны дамыту елдеріміз үшін де бірдей тиімді болады.
Атап өткендей, ағымдағы жылдың январь-август айларында өзара сауда көлемі 2,5 есеге жуық өсті. Бұған Өзбекстанның Еуропа Одағы Преференциялар бас жүйесіне («GSP+») қосылуы да ықпал етті.
Дегенмен, бұл көрсеткіш бар әлеуетке сәйкес келмейтіні, өзара саудадағы дисбалансты дұрыстау бойынша белсенді жұмыс жүргізу қажет екендігі айтылды.
Өзбекстан Еуропа Одағының жоғары стандарттары мен техникалық регламенттеріне сәйкес келетін дайын өнімді экспорттауға мүдделі.
Осы тұрғыдан алғанда, елімізде өндірілген өнеркәсіп өнімдерін Еуропа базарына шығаруда бірыңғай «СE» (Certification Europe) белгісімен сертификаттау мақсатында сынақтан өткізу саласында ынтымақтастықты жолға қою ұсынылды.
Кездесуде сондай-ақ инвестиция, құрылыс, ауыл шаруашылығы және азық-түлік өнеркәсібі, көлік, жұмыспен қамту, білім беру, медицина, туризм сияқты бірқатар бағыттар бойынша өзара ынтымақтастықты нығайту және одан әрі кеңейту мәселелері талқыланды.
