Өзбекстан Республикасының Президенті Шавкат Мирзиёев Төтенше және Өкілетті елшілер - Греция Республикасынан Параскеви Цевелеки, Индонезия Республикасынан Сити Рухайни Жухаятин, Латвия Республикасынан Гиртс Яунземс, Франция Республикасынан Валид Фук, Ресей Федерациясынан Алексей Ерхов, Жапониядан Кэндзи Хирата және Тәжікстан Республикасынан Насриддин Исматуллодан сенім грамоталарын қабылдады.
Мемлекет басшысы Жаңа Өзбекстанда өз миссиясын бастайтын дипломатиялық өкілдіктер жетекшілерін шынайы құттықтады.
Қазіргі тұрақсыз жағдайда, әлемде күрделі геосаяси және экономикалық мәселелер ушығып бара жатқан бір кезеңде, дипломаттардың рөлі барған сайын маңызды болып отырғаны атап өтілді.
– Сіздер бірнеше айдан бері елімізде жүріп, бүгінгі таңда мемлекетіміздің қандай қарқынды өзгерістер рухымен өмір сүріп жатқанын, Ташкенттің әлемдік дипломатияның маңызды орталықтарының біріне айналып бара жатқанын өз көздеріңізбен көріп отырсыздар, – деді Президент.
Атап айтқанда, биыл Ташкент халықаралық инвестициялық форумы мен Шетелдік инвесторлар кеңесінің отырысы, Парламентаралық одақтың 150-жылдық мерейтой ассамблеясы, «Орталық Азия – Еуропа Одағы» алғашқы саммиті, Халықаралық климат форумы, ЮНЕСКО Бас конференциясының тарихи сессиясы және Орталық Азия мемлекеттері басшыларының саммиті табысты өткізілді.
Соңғы жылдары Өзбекстанның бастамасымен БҰҰ Бас Ассамблеясының 13 резолюциясы қабылданды.
Биыл еліміз Ғаламдық тұрақты даму мақсаттары индексінде 19 орынға көтеріліп, соңғы 10 жылда ең жоғары нәтижеге қол жеткізген бес мемлекеттің қатарына кірді. Кейінгі сегіз жыл ішінде экономикамыз екі еседен аса өсті. Кедейлік деңгейі 35 пайыздан 6,6 пайызға дейін төмендеді.
Ашықтық саясаты нәтижесінде шамамен 100 мемлекет үшін визасыз режим енгізілді. Экспорт географиясы тұрақты түрде кеңеюде. Биыл сыртқы сауда айналымы тарихта алғаш рет 66 млрд доллардан асты. Шетелден тартылған инвестициялар көлемі 39 млрд долларға жетті.
Мемлекет басшысы, сондай-ақ Өзбекстанның Дүниежүзілік сауда ұйымына мүше болу процесін белсенді қолдағаны үшін елшілер өкілдік ететін мемлекеттердің үкіметтеріне ерекше алғыс білдірді.
Президент Греция Республикасының елшісіне қарата сөзінде осы елдің Өзбекстанның Еуропалық Одақтағы дәстүрлі әрі перспективалы әріптестерінің бірі екенін атап өтті.
Биыл екіжақты саяси консультациялар табысты өтті. Сәуір айында Ташкентте Греция елшілігі өз жұмысын бастады.
Жыл басынан бері өзара сауда көлемі 5 есе өсті. Фармацевтика, жеңіл және азық-түлік өнеркәсібі, энергетика, ақпараттық технологиялар және көлік салаларында ынтымақтастықты дамыту маңызды екені айтылды.
Алдағы уақытта Ташкентте өтетін Үкіметаралық комиссия отырысы мен Өзбекстан – Греция бизнес форумын тиімді ұйымдастыру қажеттігі атап өтілді.
Индонезия Республикасымен қарым-қатынастар туралы айта келе, Президент халықтарымызды ежелден тарихи, діни және мәдени байланыстар бірлестіріп тұрғанын атап өтті.
Екі ел арасындағы тауар айналымы жылдың басынан бері 60 пайызға артқаны атап өтілді. Химия өнеркәсібі, ауыл шаруашылығы, телекоммуникация және туризм салаларында бірқатар бірлескен кәсіпорындар табысты қызмет көрсетуде. Желтоқсан айында тікелей әуе рейстері іске қосылады.
Келер жылы Ташкентте Үкіметаралық комиссияның отырысы мен бизнес форумы, сондай-ақ Джакартада саяси консультациялар өткізілуі екі жақты қатынастардың мазмұнын тереңдетуге елеулі үлес қосатынына сенім білдірілді.
Мемлекет басшысы Латвия Республикасымен ынтымақтастықты талқылау барысында екі ел арасындағы саяси және экономикалық байланыстардың тұрақты дамып келе жатқанын, іскер топтар арасындағы қатынастардың жандана түскенін айрықша атап өтті.
Соңғы бес жылда Өзбекстанның Латвияға экспорт көлемі мен бірлескен кәсіпорындар саны үш есеге өсті. Елімізде Латвияның Инвестициялар және даму агенттігінің өкілдігі жұмыс істеп келеді.
Жуырда Ригада Өзбекстан мәдениеті күндері мен Ректорлар форумы табысты өткізілді.
Миграция саласында келісім жасалуы, әуе қатынастарының көбеюі және экономикалық ынтымақтастық тетіктерін тиімді пайдалану екі ел халықтарының бұрынғыдан да жақындасуына қызмет ететіні сөз болды.
Мемлекет басшысы Франция Республикасы жайында тоқтала отырып, белсенді саяси диалогтың нәтижесінде екі ел арасындағы қатынастар стратегиялық серіктестік деңгейіне көтерілгенін айтты. Өткен айда Стратегиялық жоспарлау тобының алғашқы отырысы өтті.
Биыл наурыз айында Парижге жасалған жоғары деңгейдегі тарихи сапар барысында 10 миллиард долларды құрайтын бірлескен жобалар бойынша уағдаластыққа қол жеткізілді. Жыл басынан бері екі ел арасындағы тауар айналымы 1,2 миллиард доллардан асты.
Франция даму агенттігімен 2030 жылға дейінгі ынтымақтастық бағдарламасы мақұлданды. Өзбекстан – Франция бірлескен университеті ашылды.
Биыл Парижде өткен Өзбекстан мәдениеті күндері мен туризм әлеуеті көрмесі халықтарымыз арасындағы байланыстарды одан әрі нығайтуға қызмет етті.
Келесі жылы Өзбекстан – Франция инвестициялық кеңесінің алғашқы отырысын және Өңіраралық форумды өткізу қажеттігі атап өтілді.
Ресей Федерациясы – Өзбекстанның көпжылдық стратегиялық әріптесі және одақтасы.
Өткен жылы екі ел арасындағы өзара сауда көлемі 12 миллиард долларға жақындады. Елімізде Ресей капиталының қатысуымен 3 мыңнан астам кәсіпорын жұмыс істеп тұр. Жыл басынан бері 4 миллиард доллар көлеміндегі инвестициялар игерілді. Ресейдің 15 жоғары оқу орнының филиалы табысты қызмет атқарып келеді.
Биыл Парламентаралық комиссияның отырысы, «ИННОПРОМ» халықаралық өнеркәсіп көрмесі, Өңірлер басшылары кеңесі, саяси консультациялар, Ректорлар форумы, Ресей мәдениеті күндері және басқа да іс-шаралар өтті.
Экономикалық ынтымақтастық жөніндегі үкіметаралық комиссияның отырысын тиімді ұйымдастыру, өңіраралық диалогты жандандыру маңызды екені айтылды.
Жапониямен стратегиялық серіктестікті кеңейту – сыртқы саясатымыздың басым бағыттарының бірі.
Өзбекстанда Жапонияның халықаралық ынтымақтастық агенттігі (JICA), Жапонияның сыртқы сауда ұйымы (JETRO) және Нагоя университетінің өкілдіктері тиімді жұмыс жүргізіп келеді.
Телекоммуникация, энергетика, денсаулық сақтау, инфрақұрылымды дамыту, білім беру және туризм салаларында 8 миллиард долларлық жобалар жүзеге асырылуда.
Стратегиялық диалогтың алғашқы отырысы тамыз айында, ал өткен айда Самарқандта Ректорлар форумы нәтижелі өтті. Осакада «Expo-2025» көрмесі аясында Өзбекстанның Ұлттық күні табысты ұйымдастырылды.
Келесі айда Токиода өтетін жоғары деңгейдегі келіссөздер мен іскер топтар кездесулері екіжақты ынтымақтастыққа жаңа серпін беретініне сенім білдірілді.
Жалпы саяси ерік-жігердің нәтижесінде соңғы жылдары Өзбекстан – Тәжікстан қатынастары стратегиялық серіктестік және одақтастық деңгейіне көтерілді.
Шекара мәселелері толық реттелді және көлік байланыстары қайта жанданды. Парламенттер, үкіметтер, өңірлер және іскер топтар арасындағы өзара іс-қимыл күшейді.
Өзара сауда көлемі 5 есе өсіп, 1 миллиард долларға жақындады. «Айбек – Фотехабад» еркін шекара маңы сауда аймағы мен «Андархан» сауда-логистика орталығының құрылуы тауар айналымын бірнеше есеге арттыруға қызмет ететіні атап өтілді.
Өнеркәсіп, транспорт, геология, энергетика, ауыл шаруашылығы мен су шаруашылығы, туризм, білім беру және мәдениет салаларында бірлескен жобаларды жүзеге асыру үшін зор әлеует бар екені айтылды.
Салтанатты рәсім соңында Мемлекет басшысы жаңа тағайындалған елшілерге абыройлы қызметінде үлкен табыс тіледі, ынтымақтастықты нығайту үшін барлық мүмкіндіктерді тиімді пайдалануға шақырды, сондай-ақ өңірлер мен жекеменшік сектор өкілдерімен белсенді байланыс орнатуды ұсынды.
Өз кезегінде шетелдік дипломаттар жылы қабылдау мен тиімді жұмыс істеуге жасалған жағдайлар үшін ризашылық білдіріп, Өзбекстанмен көпқырлы ынтымақтастықты дамыту жолында кәсіби тәжірибесі мен білімін толық жұмсауға дайын екендерін жеткізді.
