Кездесуде Өзбекстан мен Жапония арасындағы достық және стратегиялық әріптестік қатынастарын одан әрі нығайту, көпжақты ынтымақтастық пен практикалық серіктестікті кеңейтудің өзекті мәселелері талқыланды.
Арнайы кеңесші Акихиса Нагасима Мемлекет басшысына Жапония Премьер-Министрі Сигэру Исибанидің сәлемі мен жеке хатын жеткізді.
Кездесу барысында Жапонияның Өзбекстанды заң үстемдігіне негізделген еркін және ашық халықаралық ынтымақтастықты қамтамасыз етуде сенімді әрі ұзақ мерзімді стратегиялық серіктес ретінде қарастыратыны атап өтілді.
Жапония үкіметі экономикалық және инновациялық әріптестік, энергетика, өнеркәсіп, инфрақұрылым және әлеуметтік салалардағы кооперация, білім беру мен мәдени алмасу, туризм және еңбек көші-қоны бағдарламалары, сондай-ақ тиімді аймақтық ынтымақтастық сияқты кең ауқымды бағыттарда екіжақты қарым-қатынастардың қарқынды дамуын жоғары бағалайтынын ерекше атап өтті.
2024 жылы екі ел арасындағы тауар айналымы 35 пайызға артты. Жапонияның жетекші компаниялары мен банктерімен бірлескен жобалар портфелі 12 миллиард доллардан асты. Өзбекстанда 100-ге жуық бірлескен кәсіпорын мен ұйым, соның ішінде Өзбекстан-Жапония орталығы табысты жұмыс істеуде.
Өзбекстан Президенті жоғары және жоғарғы деңгейдегі белсенді диалог пен өзара сапарларды жалғастырудың маңыздылығын атап өтті. Сондай-ақ, сауда-экономикалық, инвестициялық және қаржылық-техникалық ынтымақтастықтың, соның ішінде Жапония үкіметінің Даму бағдарламасы аясындағы әріптестіктің мазмұнды күн тәртібі бар екендігі айтылды.
Өзбекстан Президенті Жапония үкіметіне биылғы жылдың сәуір айында Осака қаласында басталатын «ЭКСПО» дүниежүзілік көрмесін табысты өткізуге тілектестік білдірді.
Алдағы уақытта өтетін «Орталық Азия + Жапония» форматындағы бірінші саммитке дайындық аясында аймақтық ынтымақтастық мәселелері бойынша пікір алмасылды.
