Мемлекет басшысы Тәжікстан Президентініңбұл мемлекеттік сапары тарихи маңызға ие екенін атап өтіп, оның екі ел арасындағы ғасырлар бойы қалыптасқан достық, тату көршілік және өзара құрмет байланыстарын нығайтудағы маңызды қадам екенін ерекше айтты.

– Бүгін біз Жоғары мемлекетаралық кеңестің алғашқы отырысын бастап отырмыз. Бұл формат, сөзсіз, екіжақты ынтымақтастықты сапалық жаңа деңгейге көтереді, Өзбекстан – Тәжікстан стратегиялық серіктестік және одақтастық қатынастарын нақты мазмұнмен және озық бастамалармен байытады, – деді Шавкат Мирзиёев.

Үкіметтер, парламенттер және ведомстволар деңгейіндегі белсенді әрі тығыз байланыстар оң бағаланды.

Сапарға дайындық аясында Үкіметаралық комиссия отырысы, өнеркәсіп көрмесі, сондай-ақ өңірлер, ректорлар, ғалымдар, жастар және талдау орталықтарының форумдары табысты ұйымдастырылғаны атап өтілді. Қазіргі күндері елімізде Тәжікстан мәдениеті мен киносы күндері өтіп жатыр.

Отырыста тараптар ынтымақтастықтың жаңа бағыттарын жан-жақты талқылап, пайдаланылмай жатқан мүмкіндіктерді іске қосу жолдарын қарастырды. Сонымен қатар, өзара тиімді Өзбекстан – Тәжікстан ынтымақтастығын жеделдетуге бағытталған бірқатар маңызды шешімдер қабылданды.

Өзара сауда көлемін арттыру, өнеркәсіптік кооперацияны дамыту, көлік байланысын нығайту, су және энергетикалық қауіпсіздікті күшейту мәселелеріне ерекше назар аударылды.

Өткен жылы екі ел арасындағы тауар айналымы, негізінен дайын өнімдерді өзара жеткізу есебінен, шамамен 1 миллиард долларға жетті.

Өнеркәсіп, құрылыс, ауыл шаруашылығы, тоқыма, электротехника, фармацевтика және басқа да салаларда бірлескен жобалар табысты жүзеге асырылуда.

Бүгінде екі ел астаналары арасында әуе рейстері, автобус және теміржол қатынастары жолға қойылған. Жүк тасымалы көлемі де қарқынды өсіп келеді.

2030 жылға қарай өзара сауда көлемін 2 миллиард долларға жеткізу мүмкіндіктері қарастырылды.

«Ойбек – Фотиҳобод» шекара маңы сауда орталығын жедел салу, өнімдерді сертификаттау және «E-Permit» рұқсатнамаларын алмасудың цифрлық жүйелерін енгізу, шекаралық бақылау бекеттерін жаңғырту жөніндегі келісімдер осы мақсатқа жетуге негіз болмақ.

Сонымен қатар, тау-кен, энергетика, ауыл шаруашылығы, электротехника, жеңіл өнеркәсіп және құрылыс салаларын қамтитын арнайы өнеркәсіптік кооперация бағдарламасын қабылдау жоспарланып отыр.

Болашағы зор жобаларды қолдау үшін бірлескен инвестициялық компания капиталын ұлғайту қажеттігі атап өтілді. Сондай-ақ бүгін екі ел аумағында жаңа бірлескен жобаларды іске қосуға бастау берілмек.

Энергетика, су ресурстарын басқару, көлік және басқа да бағыттардағы серіктестік кеңінен қарастырылып, ынтымақтастықтың келешегі айқындалды.

Көшбасшылар өңіраралық байланыстарды одан әрі дамытуға, гуманитарлық, білім беру және ғылыми алмасуларды ынталандыруға келісті.

Ірі диаспоралардың бар екенін ескере отырып, мәдени және гуманитарлық ынтымақтастықты нығайтуға бағытталған бес жылдық іс-шаралар жоспарын қабылдау ұсынылды.

Мемлекет басшылары аймақтық күн тәртібі мен халықаралық саясаттың өзекті мәселелері бойынша пікір алмасты.

Орталық Азияда көпжақты құрылымдар мен өңірлік форматтар аясында тығыз диалог пен өзара қолдауды жалғастырудың маңыздылығы атап өтілді. Қауіпсіздік саласындағы ынтымақтастықты жандандыру жөнінде келісімге қол жеткізілді.

Отырыс барысында Үкіметаралық комиссия тең төрағалары – екі елдің Премьер-министрлері ынтымақтастықтың негізгі бағыттары бойынша есеп берді.

Кездесу соңында қол жеткізілген келісімдерді толық жүзеге асыру үшін кешенді «жол картасын» қабылдау белгіленді.