Соңғы бір жылда еліміздің денсаулық сақтау саласын цифрландыру бағытында ауқымды қадамдар жасалып, жұмыс мүлде жаңа деңгейге көтерілді. Осы бастамаларды жүйелі түрде үйлестіру және заманауи технологияларды енгізу мақсатында Денсаулық сақтау министрлігі жүйесінде арнайы Цифрлық денсаулық сақтау орталығы ашылды.
Мемлекет басшысына осы орталықтың Самарқандтағы филиалында атқарылып жатқан жұмыстар бойынша тұсаукесермен танысты. Онда облыстағы медициналық мекемелерді цифрландыру қарқыны, аурулар, пациенттер және дәрілік заттар туралы мәліметтерді жинақтауға арналған бағдарламалық шешімдер мен жасанды интеллект технологияларының қолданылуы, сондай-ақ олардың нақты нәтижелері туралы кең көлемде ақпарат берілді.
Атап айтқанда, салада DMED бірыңғай электронды ақпараттық платформасы толыққанды іске қосылып, бүгінге дейін 36 миллионнан астам азаматтың медициналық деректері жүйеге енгізілді. Жедел жәрдем қызметі электронды басқаруға көшіп, шақыртуларға жедел жету уақыты айтарлықтай қысқарды.
Сонымен бірге «Электрондық рецепт» жүйесін енгізу нәтижесінде артық дәрі жазу жағдайлары 40 пайызға азайып, дәрілік заттар айналымы айқын әрі ашық болды.
Республика бойынша барлық мемлекеттік медициналық ұйымдар заманауи ақпараттық-коммуникациялық жабдықтармен қамтамасыз етіліп, бірыңғай цифрлық инфрақұрылым қалыптастырылды. Үш мыңнан астам медицина мекемесі жергілікті желіге қосылып, мыңдаған жаңа компьютер сатып алынып, техникалық база толығымен жаңартылды.
Мемлекет басшысы цифрландыру арқылы денсаулық сақтау саласына қатысты барлық талдамалық мәліметтерге толық қол жеткізу мемлекеттің дамуы үшін аса маңызды екенін атап өтті. Бұл – медицинаның негізгі бағыттарын айқындау, саладағы қаржы мен ресурстарды тиімді бөлу, дәрі-дәрмек айналымын ашық әрі бақылаулы ету, сондай-ақ сыбайлас жемқорлықтың алдын алудың маңызды тетігі болып табылады. Осы бағыттағы жұмыстарды жүйелі әрі тұрақты жалғастыру бойынша тиісті тапсырмалар берілді.
– Пациенттер ағынын, аурулар құрылымын, емдеу сапасын терең талдап отырсақ, жүйенің тиімділігін одан әрі арттыра аламыз, – деді Президент.
Дәрі-дәрмек беру процесін ашық әрі жүйелі ету, сондай-ақ лицензиялау рәсімдерін оңтайландыру мәселелері де қаралды.
Елімізде жүрек-қан тамыр ауруларын ерте анықтау және жоғары технологиялы медициналық қызметтерді кеңейтуге ерекше көңіл бөлініп келеді. Барлық өңірлерде жүргізіліп жатқан жұмыстар қатарында Кардиология ғылыми-тәжірибелік медицина орталығының Самарқанд филиалы да түбегейлі жаңартылып, заманауи келбетке ие болды.
Мемлекет басшысы мұндағы жағдаймен танысты.
Орталықты дамыту үшін жалпы 52 миллиард сум жұмсалып, ауқымды реконструкция жұмыстары жүзеге асырылды. Бүгінде орталық 100 орындық емдеу мекемесіне айналып, 262 түрлі медициналық құрал-жабдықпен қамтылған.
Қызметтер ауқымын кеңейту мақсатында мобильді диагностика жүйесі іске қосылып, жеті мыңға жуық пациентке коронарография жасалды. Жоба аясында реанимация бөлімі, ситуациялық орталық және күту залы да заманауи түрде қайта жабдықталды.
Орталықта Самарқанд мемлекеттік медицина университетімен бірлесе мамандар даярлауға да үлкен мән беріліп отыр. Кардиохирургия бағыты бойынша клиникалық ординатура іске қосылып, жергілікті мамандардың біліктілігі арттырылуда.
Жаңа мүмкіндіктердің арқасында жоғары технологиялы медициналық қызметтердің көлемі айтарлықтай кеңейді. Атап айтқанда, жүрек-қан тамырларына жасалатын операциялар саны жылына 383-тен 590-ға дейін көбейді.
Мемлекет басшысына «Инфаркт және инсультке қарсы күрес» ұлттық бағдарламасының таныстырылымы барысында жүрек-қан тамыр және цереброваскуляр аурулар бойынша статистика, соңғы 5 жылдағы сырқаттану динамикасы, Еуропа стандарттарына сәйкес ұлттық бағдарламалар және пилоттық жобаның нәтижелері жөнінде ақпарат берілді.
Аталған ауруларды ерте анықтау, алдын алу және емдеу бойынша әзірленген пациенттерді бағыттау (маршрутизация) жүйесі де көрсетілді.
Президентіміз мұндай орталықтардың медициналық қызмет сапасы мен халық денсаулығын жақсартудағы маңызы жоғары екенін атап өтіп, Самарқандта қалыптасқан тәжірибені басқа өңірлерде де кеңінен енгізу қажеттігін айтты.
Осылайша Мемлекет басшысының Самарқанд облысына сапары аяқталып, Президент Ташкентке қайта оралды.
