Өзбекстанда жүзеге асырылып жатқан экономикалық реформалар түрлі салалар мен бағыттарда өз нәтижесін беруде. Республика бойынша технологиялық «серпіліс» байқалуда. Атап айтқанда, биылғы жылдың алғашқы бес айында өнеркәсіп көлемі 6,4 пайызға өсіп, саланың экспорты 6 миллиард доллардан асқан.
Бұл көрсеткішке Қашқадария өнеркәсібінің қосқан үлесі үлкен. Қаршы қаласындағы «Alp Texno Servis» кәсіпорны – осындай экспортқа бағытталған өндіріс орындарының бірі. Құны 10 миллион долларды құрайтын бұл жоба электр техникасы бағытында жаһандық жеткізу тізбегіне енген. Кәсіпорын шетелдік «TCL» және «HOFFMANN» брендтеріне тапсырыспен өнім әзірлеп беруде. Сонымен қатар, жергілікті SMART бренді де жолға қойылған. Осы маркалармен жылына 500 мың дана теледидар мен электрондық платалар өндіріледі.
Өнімдер жоғары технологиялы, сапасы мен дизайны нарық талабына сай. Сол себепті тауарлардың 70 пайызы экспортқа жөнелтіледі. Өткен жылы 2 миллион доллардан астам өнім экспортталған болса, биылғы жоспар – 10 миллион доллар.
Мемлекет басшысы бұл саланы одан әрі дамыту қажеттігін атап өтті.
– Бұл бағытта тәжірибе жинадық, сыртқы нарыққа жол аштық. Енді бұл кәсіпорынды кеңейту қажет. Адамзат барда, мұндай өнімдерге сұраныс та болады. Ең бастысы – сапа мен өнім түрлерін арттырып, бәсекеге қабілетті болу керек, – деді Шавкат Мирзиёев.
Тағы бір маңызды міндет – жергіліктендіру. Қазір кәсіпорында бұл көрсеткіш 50 пайыздан асқан. Алдағы уақытта 20 миллион долларлық 4 жоба аясында шаңсорғыш, электр шәйнек, ауа салқындатқыш пен желдеткіштер шығару көзделген. Бұл арқылы жылына 30 миллион доллар көлемінде экспорттық мүмкіндік қалыптасады.
Кәсіпорында бүгінде 200 адам тұрақты жұмыспен қамтылған. Сонымен бірге Қаршы мемлекеттік техникалық университетімен дуальді білім беру жүйесі іске қосылған.
