Соңғы жылдары республикада ақпараттық технологиялар саласы қарқынды дамып келеді. Жеті жыл бұрын ел аумағында IT-компаниялардың саны 147 болса, бүгінде олардың саны 2 мыңнан асты. Оларда 30 мың жоғары табысы бар мамандар жұмыс істейді. 70 мыңнан астам жас IT саласымен өз бетінше айналысады.
«Өзбекстан-2030» стратегиясында бұл саладағы экспорт көлемін 5 миллиард долларға жеткізіп, 300 мың жасты жұмыспен қамту көзделген. Шалғай елді мекендерде де IT-қалашықтар ұйымдастыру басталған.
Атап айтсақ, Қарақалпақстандағы IT-парк резиденттерінің саны бүгінде өткен жылдың соңымен салыстырғанда үш есеге артып, 108-ге жетті. Олар 310 маманды жұмыспен қамтыды. 2024 жылдың бірінші жартыжылдығында қызмет көрсету көлемі 2,4 есеге, экспорт көлемі 1,7 есеге өсті.
Білім беру резиденттері тарапынан 25 мың жас және мемлекеттік қызметші оқытылып, біліктіліктерін арттырды. «Бір миллион бағдарламашы» жобасы аясында 2023 жылы онлайн платформа арқылы 18 мың жас білім алса, 2024 жылдың бүгініне дейін 29 мың жас оқытылды. Биыл 33 мыңнан астам жасты біліммен қамту жоспарланған.
Бұл нәтижелер олардың жасалған жағдайлардың көрінісі саналады. Мемлекет басшысы 2021 жылы облысқа сапары барысында ІТ-паркке жаңа ғимарат салу жөнінде тапсырма берген болатын. Соған сәйкес Нөкіс қаласының орталығында 17 этажды заманауи ғимарат салынды. IT оқыту және коворкинг орталықтары, кеңселер, конференц-зал және қызмет көрсету бөлмелері бар. Сондай-ақ ғимаратта IT-парк резиденттері, салада жұмыс істейтін инвесторлар және шетелдік аутсорсингтік компаниялар орналасады.
Бұған дейін екі қабатты ғимаратта ашылған ІТ-парктің бүгінде зәулім кешенге көшуі жоспардың қаншалықты үлкен екенін көрсетеді.
Мемлекет басшысына ғимаратта атқарылған жұмыстар, нәтижелер мен саладағы жоспарлар туралы баяндалды.
Мысалы, бұған дейін АҚШ-тың Amazon компаниясында жұмыс істеген қарақалпақстандық Бекназар Абдикамалов еліне оралып, HUPO стартапына 4 миллион доллар инвестиция тартқан. Мемлекет басшысы онымен әңгімелесіп, бастамаларына қолдау білдірді.
Мемлекет басшысы ІТ-парк резиденттері, ақпараттық технологиялар саласында жұмыс істейтін мамандармен сұхбаттасты. Жастардың пікірін тыңдап, ұсыныс-пікірлерін қолдау бойынша жауапты тұлғаларға тапсырмалар берді.
– Бұл салада стартаптарды жүзеге асырсақ, өндірістердің өнімділігі артып, мемлекет шығындары азайып, жастар үшін жұмыс орындары ашылады, – деді Шавкат Мирзиёев.
Ғимаратта UZINFOCOM орталығының филиалы да орналасқан. Орталық uStudy бағдарламасы арқылы облыс жастарын заманауи мамандықтарға оқытады. Білімі жетілдірілген кадрлар өз саласы бойынша заманауи компанияларда жұмыс істейді.
Президент барлық өңірлердегі ІТ-парктер үшін мемлекеттік-жекеменшік әріптестік негізінде осындай көпқабатты ғимарат салу қажеттігін айтты.
– Мұндай жерлерде жастар өздерін еркін сезінетіндей орта болуы керек. Тамақтану, демалыс, спорт және басқа да қызметтер бар болсын. Ғимараттар қалалардың орталығында, жастарға қолайлы жерлерде болғаны абзал, – деді Мемлекет басшысы.
Аталған IT-паркті Қарақалпақстан аудандарындағы мектептермен байланыстыру, осы салаға қызығушы жастарды оқыту, оларды болашақта табысы жоғары жұмысқа тарту жөнінде тапсырмалар берілді.
