Кездесуде бірлескен күш-жігердің арқасында бауырлас елдер арасындағы қарым-қатынастар стратегиялық серіктестіктің жаңа деңгейіне көтерілгені айтылды.
Мемлекет басшылары екіжақты сауданың соңғы жылдардағы қарқынын қанағаттанушылықпен атап өтті және сауданы одан әрі ұлғайту үшін барлық қолда бар ресурстар мен мүмкіндіктерді пайдалануға келісті.
Сауда үйлерін құру және үшінші елдердің нарығына шығу мақсатында өзара өнімдердің ассортиментін кеңейту мен әртараптандыру - бұл тұрғыдағы бағыттардың бірі.
Әр түрлі салалардағы өнеркәсіптік кооперацияның дамуы, соның ішінде автокөліктерді, химикаттарды, электр және тұрмыстық техниканы, құрылыс материалдарын құрастыру, мақта талшығы, жемістер мен көкөністерді терең өңдеу, логистикалық инфрақұрылымды құру екіжақты ынтымақтастықтың перспективалы бағыттары ретінде белгіленді.
Өзбекстан президенті тиісті «жол картасын» дайындауды ұсынды.
Тараптар көлік және транзиттік дәліздерді дамыту саласындағы ынтымақтастықты жандандыруға келісті. Ашхабад келісімін бірлесе ілгерілету және Түрікменбашы теңіз портының бірегей әлеуетін пайдалануды кеңейту маңызды екені айтылды.
Бұл саладағы өзара үйлестірілген бірлескен күш-жігер жүк тасымалы көлемін ұлғайту мен транзиттік әлеуетті іске асыру үшін қолайлы жағдайлар жасайды.
Екі елдің аймақтарындағы мүмкіндіктерді толық пайдалану маңызды екені айтылды және ынтымақтастықтың жаңа тетігі - аймақаралық форум құру туралы келісімге қол жеткізілді.
Кездесуде халықтар арасындағы достық пен өзара түсіністікті нығайтуда маңызды фактор болып табылатын мәдени-гуманитарлық саладағы ынтымақтастық мәселелері де талқыланды.
Мәдениет пен кино күндерін ұйымдастыру, театр мен музыкалық топтардың шығармашылық саяхаттары, ғалымдардың кездесулері және басқа да осыған ұқсас шаралар біздің халықтарды жақындастыруға қызмет етеді.
Осы орайда, «Жібек жолының інжу-маржаны» атты Ташкент халықаралық кинофестивальді қайта жандандыру туралы бастамаға Түрікменстан тарапы қолдау білдіргені айтылды.
Шавкат Мирзияев бүгінгі таңда Өзбекстанда 200 мыңнан астам түркімен ұлтты азаматы тұратынын мәлімдеп, олар Өзбекстанның көп ұлтты халқын құрайтын барлық басқа ұлттар, ұлыстармен бірге бір отбасының балалары ретінде тату-тәтті өмір сүріп келе жатқанын айтты.
- Олар өз тілін, мәдениетін, дәстүрі мен әдет-ғұрпын дамытуы үшін барлық жағдайды жасауды жалғастырамыз. Ашхабадта Гурбангулы Мяликгулыевич бастамасымен салынып жатқан «Ташкент» саябағы біздің халықтар достығының тағы бір жаңа белгісі болатынына сенімдімін», - деді Шавкат Мирзияев.
Келіссөздер барысында Ауғанстандағы бейбітшілік пен тұрақтылық бүкіл Орталық Азия аймағында тұрақты дамудың кепілі екені айтылды.
- Біз бұдан әрі де ауған халқына қажетті гуманитарлық көмек көрсетуді жалғастыруға, бұл елде маңызды әлеуметтік-экономикалық және инфрақұрылымдық жобаларды жүзеге асыруда түрікмен әріптестерімен белсенді ынтымақтастық орнатуға дайынбыз, - деді Өзбекстан Президенті.
Президенттер халықаралық аренадағы, олар қатарында БҰҰ, ТМД, Еуропадағы Қауіпсіздік және Ынтымақтастық Ұйымы, Экономикалық Ынтымақтастық Ұйымы, Ислам Ынтымақтастығы Ұйымы, Түркітілдес мемлекеттер Ұйымы аясында тығыз диалогты жалғастыруға және бастамаларды бірлесіп ілгерілетуге уағдаласты.
Келіссөздер қорытындысы бойынша президенттер екіжақты ынтымақтастық жөніндегі үкіметаралық комиссияның тең төрағаларына қол жеткізілген келісімдерді жүзеге асырудың нақты тетіктерін қамтитын «жол картасын» дайындауды тапсырды.
