Елімізде экономиканың стратегиялық салаларын ғылыми негізде дамыту, инновацияларды және жоғары қосылған құны бар өнімдер өндірісін кеңейту басым міндеттердің бірі болып саналады. Бұл үдеріс, ең алдымен, заманауи білім мен практикалық дағдыларды меңгерген білікті кадрларды даярлаумен тығыз байланысты.
Осы мақсатта Өзбекстан Республикасы Президентінің 2021 жылғы 23 маусымдағы қаулысына сәйкес «Жаңа Өзбекстан» университеті құрылды.
Жаңа Ташкентте бой көтеріп жатқан университет ғимараттар кешенінің бастапқы құны 200 миллион АҚШ долларын құрайды және 50 гектар аумақты қамтиды.
Жоба Жаңа Ташкент қаласын салу дирекциясының тапсырысы негізінде түркиялық мамандармен бірлесіп әзірленген. Құрылыс жұмыстарын «Özgüven» компаниясы жүзеге асыруда. Университет ғимараттарын 2027 жылы пайдалануға беру жоспарланған.
Кешен құрамында 10 мың студентке арналған 5 факультет, ректорат, мыңнан астам орынға ие кітапхана, музей, көрме залдары, мультимедиа бөлмелері салынады. Сонымен қатар, студенттер үшін мың орындық спорт кешені мен жүзу бассейні, профессор-оқытушылар мен студенттерге арналған 2 мың орындық жатақханалар және асханалар бой көтереді.
Қазіргі уақытта құрылыс жұмыстары үш кезеңде жүргізілуде. Мемлекет басшысы жобаның негізгі параметрлеріне, оқу үдерісіне арналған инфрақұрылым мен жасалатын жағдайларға ерекше назар аударды. Жастардың ғылыми және зияткерлік әлеуетін ашуда осындай заманауи білім ордаларының маңызы айрықша екені атап өтілді.
– Осы университетте жүзеге асырылып жатқан құрылыс жұмыстары мен білім беру бағдарламалары өзге жоғары оқу орындары үшін үлгі болуы тиіс, – деді Мемлекет басшысы.
Жауапты тұлғаларға басқа да жоғары оқу орындарын осы үлгіде жаңғырту, жабдықтау, білім беру саласына озық технологияларды кеңінен енгізу жөнінде тапсырмалар берілді.
Сондай-ақ, шамамен 4 гектар аумақта Өзбекстан Ұлттық кітапханасының жаңа ғимаратының құрылысы жүріп жатыр. Нысан ұлттық сәулет дәстүрі мен заманауи архитектуралық шешімдерді үйлестіре отырып жобаланған.
Төрт қабатты ғимараттардың жалпы ауданы 30 мың шаршы метрден асады және бір мезетте 1420 оқырманға қызмет көрсете алады. Кітапхана қорларын сақтау, есепке алу, қауіпсіздігін қамтамасыз ету және стерилизациялау үшін жоғары технологиялы арнайы бөлмелер қарастырылған.
Кешен көпфункциялы болып, халықаралық және ұлттық ірі кітапханалардың электронды базаларына онлайн қосылу мүмкіндігі жасалады. Зағип азаматтар үшін арнайы оқу және зерттеу ортасы ұйымдастырылады. Сонымен бірге келушілерге арналған 300 орындық кафе, галерея, жеңіл спорт ойын алаңдары мен демалыс аймақтары салынады.
Президент бұл кітапхана Жаңа Ташкентте бой көтеріп жатқан білім мен ағарту ошақтары жүйесінде маңызды орын алып, жас ұрпақтың зияткерлік дамуы үшін берік негіз болатынын атап өтті. Ғылым мен руханиятқа инвестиция салған мемлекеттің экономикалық әлеуеті де тұрақты әрі жоғары болатыны айтылды.
Заманауи кітапхананың мүмкіндіктерін толыққанды пайдалану үшін қызметкерлердің ақпараттық технологиялар мен халықаралық стандарттарды терең меңгеруі қажеттігіне назар аударылды.
