CGTN агенттігінің хабарлауынша, Қытай әлемде алғаш рет қуаты 20 МВт болатын теңіз жел турбинасын орнатты. Жоба China Three Gorges Co компаниясы тарапынан жүзеге асырылды.
Ауқымды турбина Қытайдың оңтүстік-шығысындағы Фуцзянь провинциясының жағалау суларында, құрлықтан 30 шақырымнан астам қашықтықта орнатылған. Жобаны іске асыру барысында елеулі инженерлік қиындықтар туындады: монтажшылар үлкен тереңдікте, күрделі ауа райы жағдайында, соның ішінде муссон маусымында және экстремалды биіктіктерде жұмыс істеуге мәжбүр болды.
Орнату жұмыстарына 2000 тоннаға дейінгі жүкті көтере алатын жаңа буындағы мамандандырылған кеме пайдаланылды. Жоғары дәлдіктегі орналастыру жүйелерінің көмегімен мамандар әрқайсысының ұзындығы шамамен 150 метр болатын үш қалақты 174 метр биіктікке көтеріп, оларды орталық роторға аса дәлдікпен бекітті. Су бетінен қалақтардың ұшына дейінгі жалпы биіктік 321 метрді құрайды, бұл Эйфель мұнарасының биіктігімен (324 метр) шамалас.
Энергетикалық желіге қосылғаннан кейін турбина жылына 80 миллион кВт/сағаттан астам электр энергиясын өндіре алады. Бұл шамамен 44 000 үй шаруашылығын электр қуатымен қамтамасыз етуге жеткілікті. Экологиялық тұрғыдан алғанда, мұндай құрылғы жыл сайын шамамен 24 000 тонна көмірдің орнын басып, көмірқышқыл газ шығарындыларын 64 000 тоннаға дейін азайтуға мүмкіндік береді. Бұл туралы korrespondent.net хабарлады.
