Өзбекстанда кәсіпкерлерге қолайлы жағдай жасау, экономиканы әртараптандыру және халықты жұмыспен қамтуды қамтамасыз ету мақсатында аймақтарда технопарктер мен шағын өнеркәсіп аймақтары құрылуда. Қазіргі таңда Наманган облысында жалпы аумағы 1,5 мың гектарды құрайтын 73 өнеркәсіп аймағы бар.
Осы нәтижелер Жаңа Наманган ауданындағы «Соҳил» махалласы мысалында да айқын көрінуде. Бұрын кәсіпкерлер мен қолөнершілер өз үйлерінде шектеулі жағдайда еңбек етсе, бүгінде заманауи инфрақұрылымы бар біртұтас кешенде жұмыс істеп жатыр.
«Ғиждуван тәжірибесі» негізінде 10 гектар аумақта құрылған бұл аймақта 113 жоба орналастырылған. Олардың тұрақты жұмыс істеуі үшін бюджет есебінен электр энергиясы, ауыз су және кәріз жүйелері, ішкі жолдар сынды қажетті инфрақұрылым жасалған.
Нәтижесінде жылына 500 миллиард сумдық өнім өндіру және қызмет көрсету қуаты пайда болды, 4800 жаңа жұмыс орны ашылды. Сондай-ақ көршілес махаллалардан 170 кәсіпкер тартылып, 350-ден астам отбасында кооперация негізінде өнім өндіру жолға қойылып, халықтың экономикалық белсенділігі артты.
Тағы бір маңызды қыры – мұндағы дайын құрал-жабдық пен тәжірибені пайдаланып, жұмыссыз азаматтарды қайтадан кәсіпке үйрету мүмкіндігі бар. Бұл жұмыссыздық пен кедейлікті азайтып, халықтың әл-ауқатын көтеруге қызмет етеді.
Мемлекет басшысы автомобильге техникалық қызмет көрсететін сервис орталықтарының жұмысымен танысып, мамандармен әңгімелесті.
– Елімізде жаңа автомобиль зауыттары іске қосылуда. Халықтың табысы өсіп, көлік саны артуда. Алайда сервис саласында әлі де мүмкіндік мол. Мәселен, шетелдік автомобильдерге қызмет көрсету жеткілікті деңгейде емес. Мұны жүйелі жолға қою арқылы халықты жұмыспен қамтып, қызмет сапасын арттыруға болады, – деді Шавкат Мирзиёев.
Сондықтан мұндай сервис орталықтарын өзге аудандарда да құру, білікті мамандар дайындау жөнінде тапсырмалар берілді.
Президент өнеркәсіп аймағында өндіріліп жатқан жиһаздар көрмесін де тамашалады. Жергілікті өнеркәсіпті дамыту, кәсіпкерлердің қызметін кеңейту, жастардың тәжірибе жинап, жұмысқа орналасуына қолдау көрсету міндеттері қойылды.
Мұндай кешендерде адамға қамқор болуға да заманауи тәсілдер енгізілуі қажет екені айтылды. Өрт және техникалық қауіпсіздікті қамтамасыз ету, еңбекпен қатар қызметкерлердің демалуы үшін де қолайлы жағдай жасау маңызды екені атап өтілді.
Сондай-ақ осы жерде Наманган облысында қала құрылысы мен тұрғын үй саласында жүзеге асырылып жатқан ірі жобалар туралы мәлімет берілді. Бұл жұмыстар халықтың заманауи тұрмыс жағдайын қамтамасыз етіп, аймақтарды кешенді дамытуға зор ықпал етеді.
