Кўргазмада Ўзбекистон тўқимачилик корхоналарининг "Made in Uzbekistan" бренди остидаги ягона миллий стендининг тантанали очилиш маросими бўлиб ўтди. Унда 15 га яқин тўқимачилик корхоналари 200 кв.м дан ортиқ майдондан ўз маҳсулотлари кўргазмаларини ўтказмоқда.
— Янги ташкил этилаётган қувватларимиз эвазига биз нафақат Европа балки Америка ва бутун дунё бозорларига кириб боришга тайёрмиз, — дейди кўргазмада иштирок этаётган Наманган йирик уй тўқимачилик маҳсулотларига ихтисослашган "Art Soft Holding" корхонаси раҳбари Олимхон Бобохонов. — Шунингдек, рақобатбардош маҳсулотларимиз орқали ўз брендимизни танитгани келдик.
Теxtima Export Import GmbH компаниясининг ҳудудий савдо бўйича менежери Наргиза Маҳкамова кўргазма таассуротлари ҳақида ўртоқлашаркан, жумладан шундай деди: — Бугун биз Франкфурт-Майн шаҳрида анъанавий "Heimtextil — 2023" тўқимачилик кўргазмасида турибмиз. Биз хорижий компаниялар билан самарали ҳамкорлик қилиб, Ўзбекистонда тўқимачилик саноатини ривожлантириш бўйича турли лойиҳаларни амалга оширмоқдамиз. Сўнгги йилларда мамлакатимизда тўқимачилик саноати жадал суръатлар билан ривожланаётганини алоҳида таъкидламоқчиман. Ўзбек уй тўқимачилик маҳсулотлари гўзаллигини бутун дунёга кўрсатиш учун бизда кўп имкониятлар мавжуд.
Умуман олганда, 2022 йилда ўзбек тўқимачилик маҳсулотлари экспорти йиллик ўсиш 10,7 фоизни ташкил этиб, 3,2 миллиард АҚШ долларидан ошди. 2025 йилга бориб тўқимачилик маҳсулотлари экспорти 7 миллиард долларгача ўсиши кутилмоқда.
Республикамизда тадбиркорлик фаолиятининг ҳуқуқий асослари яратилаётгани, раҳбариятнинг мамлакатимиз иқтисодиётини янада ривожлантиришга интилиши, янги инвесторларни жалб этишга интилиши ўзининг юксак самара бермоқда.
Германиянинг "Karl Mayer Stoll Textilmaschinfabrik Deutchland" компанияси вакили Маттиас Мюллернинг фикрича Ўзбекистон тўқимачилик маҳсулотлари ўзининг юқори сифати ва жозибадорлиги билан эътиборни тортмоқда. — Мен "Darnier" корхонасида ишлаганман ва Ўзбекистонга тез-тез келиб турардим. Ҳозир мен Karl Mayer Stoll Textilmaschinfabrik Deutchland компаниясида тўқув-тайёрлаш дастгоҳлари савдоси билан шуғулланаман. Бугун шундай улкан кўргазмада бўлиб турганимдан хурсандман. Бу ерда эски ва янги ҳамкорлар билан учрашиш учун ажойиб имконият мавжуд. Келгусида самарали ҳамкорликни орзиқиб кутаман. Сизнинг стендингиз жуда чиройли ва кўпчиликни ўзига жалб қилади, бу инвесторлар учун яхши белгидир, — дейди Мюллер.
