Пабло Пикассонинг 11 та санъат асари Лас-Вегасдаги "Беллагио" меҳмонхонасида ким ошди савдосига қўйилди.
Аукционда 1973 йилда вафот этган испаниялик рассомнинг тўққизта сурати ва иккита керамик буюмлари намойиш этилди. Маълум қилинишича, тўплам 50 йилдан ортиқ тўпланган бадиий ижод маҳсулотларини ўз ичига олади.
Умумий ҳисобда унинг суммаси 108,9 миллион долларни ташкил этган. Унда 1938 йилги Пикассонинг севгилиси ва илҳомлантирувчиси Мари-Терес Валтер акс этган сурат Қизил-тўқ сариқ беретли аёл картинаси кечанинг энг юқори баҳоланган асари бўлиб, унинг баҳоси 40,5 миллион долларга этган.
Яна бир дурдона асар "Одам ва бола" номли катта ҳажмдаги портрет 24,4 миллион долларга сотилган. Шунингдек, сотувга Пикассо томонидан 1942 йилда фашистларнинг Парижни босиб олган пайтида чизган "Nature Morte au Panier de Fruits et aux Fleurs" (Мевали сават ва гуллар билан натюрморт) асари ҳам киритилган.
У 16,6 миллион долларга баҳоланган. Мазкур тўпламни йиғиш 20 йилдан кўпроқ вақт олдин "Bellagio" меҳмонхонасининг собиқ эгаси, америкалик казино магнати Стив Уин томонидан бошланган.
Суратлар аукционга қўйилишдан олдин меҳмонхонадаги Пикассо ресторанида намойиш этилган. Замонавий санъат музейининг (Нью-Йорк) баҳолашига кўра, Пикассо ўз ҳаётида 20 мингга яқин асар яратган.
Пабло Пикассонинг энг машҳур расмлари: "Герника", "Авинён қизлари", "Комедиячилар оиласи", "Абсент севувчиси", "Шардаги қиз", "Амбруаз Волларнинг портрети", "Дора Маар мушук билан", "Жаклин ва гуллар" асарларидир. Бу ҳақда Интеллектуал мулк агентлиги телеграм каналида маълум қилинмоқда.
