Ҳафталик 534-сонида мусобақадаги энг юқори максимал тезликка эга 20 нафар футболчи беш позиция тоифаси бўйича тақдим этилган. Шунингдек, улар босиб ўтган масофанинг тезликлар кесимидаги тақсимоти ҳам келтирилган.
Маълумотларга кўра, Ўзбекистонлик Абдуқодир Ҳусанов — Manchester City ҳимоячиси — марказий ҳимоячилар орасида энг юқори тезликни қайд этган (35,8 км/соат). У бу борада Tottenham Hotspur футболчиси Микки ван де Венни ортда қолдирган.
Қанот ҳимоячилари ўртасида Paris Saint-Germain аъзолари Ашраф Ҳакими (36,4 км/соат) ва Нуну Мендеш пешқадамлик қилмоқда. Марказий ярим ҳимоячилар орасида Арчи Грей (34,8 км/соат) энг юқори кўрсаткичга эга. Қанот ярим ҳимоячилари/вингерлар орасида Энтони Гордон (37,9 км/соат) етакчи бўлса, марказий ҳужумчилар ичида Kylian Mbappé 35,7 км/соат натижа билан биринчи ўринни эгаллаган.
Тезлик тоифалари бўйича масофа тақсимотига кўра, рўйхатга киритилган 100 нафар футболчи орасида 7 км/соатдан паст тезликда энг кўп масофа босиб ўтган уч нафар марказий ҳужумчи қуйидагилар: Kylian Mbappé (43,5%), Victor Osimhen (41,9%) ва Luis Suárez (40,1%).
Аксинча, энг кам юриш (паст тезликда ҳаракат) улушини қайд этган уч футболчи — марказий ярим ҳимоячилар: Håkon Evjen (23,0%), João Simões (24,1%) ва Lucas Bergvall (25,2%).
