Айни кунларда Нидерландиянинг Вейк-ан-Зее шаҳрида шахмат бўйича нуфузли «Tata Steel Chess-2023» турнири давом этмоқда.
Кеча мусобақанинг 11-турида барчанинг диққат-маркази «Мастерс» гуруҳининг етакчилари Нодирбек Абдусатторов ҳамда нидерландиялик Гири Аниш ўртасидаги баҳсга қаратилди.
Қизиқарли тактикаларга бой ўйинда томонлар муроса кўчасини танлашди ва ўз ҳисобларига 0.5 очкодан ёзиб қўйдилар. Ушбу баҳсдан сўнг очколари ҳисобини 7.5 тага етказиб олган Абдусатторов ҳамон пешқадамликни сақлаб турибди.
«Челленжер» гуруҳида 11-турда оқ доналарда нидерландиялик Макс Вармердамга қарши баҳс олиб борган Жавоҳир Синдоров ҳам дуранг қайд этди. Ушбу натижадан сўнг Синдоров очколарини 7 тага етказиб олди ва совринли ўринлар учун курашни давом эттирмоқда.
Бугун Нидерландия мезбонлик қилаётган нуфузли шахмат турнирида 12-тур баҳслари бўлиб ўтади. «Мастерс» гуруҳида пешқадамликни бермаётган Нодирбек Абдусатторов (2713) бу гал америкалик Уэсли Сога (2760) қарши беллашади. «Челленжер»гуруҳида 3-ўринни эгаллаб турган Жавоҳир Синдоровга (2654) эронлик Амин Табатабеи (2686) рақиблик қилади.
