Делегация таркибида компаниянинг II-вице президенти Антони Бринхюзен, инвестиция бўйича директор Ражит Нанда, бизнесни ривожлантириш катта менежери Тарик Таибаҳ ҳамда «ACWA POWER SIRDARYA» компанияси директори Алимардон Абдукаримовлар ҳам иштирок этди.
Ташрифдан кўзланган мақсад Ширин энергетика коллежининг бугунги қиёфасини кўздан кечириш ҳамда коллежда жорий этилган таълим сифати билан яқиндан танишишдан иборат.
Ташрифи давомида делегация аъзолари, Шаҳар сектор раҳбарлари, коллежнинг бир гуруҳ педагог ходимлари иштирокида анжуман ташкил этилди. Ширин шаҳар ҳокими Сарвар Султонов Ширин энергетика коллежида «ACWA POWER» компанияси ҳомийлигида амалга оширилган реконструкция ишлари, коллежда ўқувчиларнинг таълим олишлари учун яратилган замонавий шароитлар учун компания бош директори ҳамда мутасаддиларга ўз миннатдорчилигини билдирди.
Шу билан биргаликда тадбир давомида Ширин энергетика коллежида жорий этилган таълим тизими ҳолати ҳамда ўқитиш методикаси хусусида «NOMAC» компаниясининг Ўзбекистондаги лойиҳа менежери Ҳоссем Аҳмад ҳамда коллеж директори ва ўқитувчилари томонидан анжуман иштирокчиларига батафсил тушунтириб ўтилди.
Анжуман якунида Саудия Арабистонининг «ACWA POWER» компанияси раиси Муҳаммад Абу Найян коллежда йўлга қўйилган таълим тизимини ижобий баҳолади. Шунингдек, Абу Найян ўқув йили давомида ўз билими ва фаоллиги жиҳатидан бошқа ўқувчиларга намуна бўлаётган ўқувчи, шунингдек, ҳар тарафлама ташаббускор ва фидойи ўқитувчиларнинг ҳар бири учун Саудия Арабистонининг «Умра» сафарига компания ҳомийлиги асосида икки кишилик бепул йўлланма тақдим этишини айтиб ўтди.
Тадбирдан сўнг мазкур делегация Ширин шаҳар ҳамда Боёвут туманларига туташ бўлган ҳудудда қурилаётган янги «буғ-газ» иссиқлик электр станцияси қурилиш жараёнини кўздан кечирди, деб хабар беради Ширин шаҳар ҳокимлиги Ахборот хизмати.
