Ўзбекистон Республикаси Бош вазири ўринбосари Азиз Абдуҳакимов ва Андижон вилояти ҳокими Шуҳратбек Абдураҳмонов вилоят аҳлини мана шундай кўркам мажмуа барпо этилгани билан муборакбод этишди.
«Ўзбекистон Президенти топшириғига кўра, оммавий спортни ривожлантириш тўғрисида фармон қабул қилинган эди, шунингдек стадионларни янги концепция - “Ареналар концепцияси”га ўтказиш бўйича топшириқ берилган эди. Бугунга келиб бу йўналишда биринчи қадамлар ташланди. Илгари бу стадион 12 ойнинг атиги 1 ойи давомида, яъни тахминан 20-25 кун фаолият юритган, бу вақтда 10 тагина мусобақа ўтказилган, холос. Бошқа вақт бўш турган. Таъкидлаш жоизки, арена авваллари йилига 20-25 кун фаолият юритган бўлса, энди маданий, оммавий, кўнгилочар тадбирлар ўтказиш эвазига бу кўрсаткич 100-120 кунга оширилади. Биз бу лойиҳани яна бир йил давом эттириб, замонавий спорт-кўнгилочар масканга айлантирамиз», - деди Азиз Абдуҳакимов.
Давлат раҳбари фармонига кўра, арена атрофида кичик кўнгилочар ҳудуд барпо этилган бўлиб, бу мазкур ўйингоҳга келган аҳолининг мароқли ҳордиқ чиқариши учун хизмат қилади. Ушбу стадион давлат-хусусий сектор шерикчилиги асосида тадбиркорга берилган бўлиб, бугунга келиб тадбиркор ўз ҳисобидан 6 миллиард сўмга яқин харажат қилган. Шу билан бирга, тадбиркор бу ерда тижорий фаолиятни ҳам йўлга қўйгани учун жамоа харажатларини ҳам ўз зиммасига олган, бу билан бюджетга ҳам 20 миллиард иқтисод қилинмоқда.
Маълум қилинишича, Ўзбекистоннинг бошқа ҳудудларидаги стадионлар аренага айлантирилиши устида тизимли равишда иш олиб борилмоқда.
«Испанияга Бутунжаҳон туризм ташкилоти йиғилишига борганимда у ерда “Atletica Madrid’’ клуби раҳбарияти билан учрашиб, айнан шу ареналар тажрибасини ўрганиб келган эдим ва мана бугун Ўзбекистонда ҳам шу йўналишдаги биринчи амалий қадамлар қўйилмоқда. Аренанинг атрофида кўплаб дўконлар ташкил қилинмоқда, уларда спорт кийимлари ва аксессуарлари сотуви йўлга қўйилган. Овқатланиш жойлари ташкил этилмоқда. “Atletica Madrid’’ тажрибасини ўрганиш давомида уларнинг стадионда нафақат спорт тадбирларини ўтказишлари, балки бошқа тадбирларни ўтказиш орқали қўшимча хизматлар ва рекламалардан 30 фоиз даромад олишлари маълум қилинди. “Bobur Arena’’нинг атрофида бир неча LED-экранлар ўрнатилган бўлиб, арена эгалари реклама сотиш эвазига ҳам даромад кўриш имконига эга бўлади. Бундан ташқари, машҳур хонандалар концерт дастурлари, йирик MMA жангларини ўтказиш ҳисобига ҳам арена доимий ишлайдиган бўлади. Тадбирлар кўпайгани сайин табиийки бу ерга келувчилар сони ҳам ошиб боради, бу эса реклама берувчи талабгорлар сонининг ошишига олиб келади. Бу ҳам қўшимча даромад келтиради» - деди Азиз Абдуҳакимов.
Хулоса қилиб айтганда, Андижондаги “Bobur Arena” мажмуасининг фаолият кўлами кенгайиши вилоятда туризм ва спорт соҳалари ривожи йўлида хизмат қилиш баробарида кўплаб янги иш ўринларининг яратилишига олиб келади.
