Аёл икки нафар боласи билан уйнинг тўққизинчи қавати деразасидан сакрашга уринаётгани ҳақидаги хабардан сўнг автопатруль воқеа жойига етиб келган. Воқеа жойига биринчи бўлиб 26 сонли ички ишлар бўлими катта инспектори Асқар Папишев ўзининг шериги Елдос Нугманов билан бирга етиб келди – у ўша пайтда туман аҳолиси билан учрашув ўтказаётган эди.
Полиция ходимлари тўққизинчи қаватга кўтарилган пайтда аёлнинг тўнғич фарзанди аллақачон отасининг олдида эди. Кенжа фарзандини эса аёл қўлидан ушлаб турганди ва у кимдир уларга яқинлашса, пастга сакрашини айтди.
Ҳуқуқ-тартибот идоралари ходимларидан бири аёлни гап билан чалғитмоқчи бўлган бўлса, иккинчиси фуқаролик кийимини кийиб олди ҳамда хонадонга кириб, орқадан жимгина яқинлашиб, аёлни ва унинг боласини қутқариб қолди ҳамда фожианинг олдини олди.
Кейинчалик маълум бўлишича, 24 ёшли аёл оилавий жанжалдан кейин умидсизликка тушиб қолган. Ёш онани бу ҳолга солган турмуш ўртоғига нисбатан Маъмурий жавобгарлик тўғрисидаги кодекснинг 73-моддаси 1-қисми “Оила-маиший муносабатлар соҳасидаги қонунга хилоф ҳаракатлар” билан маъмурий баённома тузилди. Оила алоҳида назорат остида, деб хабар беради tengrinews.kz.
