Тинчлик, осойишталик, қалб хотиржамлиги — энг улуғ неъмат. Уларнинг мазмун-моҳиятини уруш қатнашчилари ҳаммадан кўра чуқур ҳис қилади, эъзозлайди. Фахрийларимиз билан суҳбатлашсангиз, кўзда ёш, қалбда армон билан уруш даври хотираларини сўзлаб беришади. Беихтиёр бугунги кунларга шукрона айтасиз. Уларнинг мустаҳкам ирода, матонат ила ғалаба учун чеккан захматларию, қилган меҳнатлари олдида бир умр қарздормиз.

Ана шундай фахрийларимиздан бири — Шеробод туманининг Галагузар маҳалласида истиқомат қилиб келаётган 96 ёшли Кенжа бобо Эломонов урушни шундай хотирлайди:

— 18 ёшимда урушга кетганман. Мени кузатаётган яқинларимнинг юзидаги хавотирни, аламни жуда яхши эслайман. Ўшанда йиллар ўтиб, инсон-роҳат-фароғатда яшайдиган мана шундай кунлар келишини ким тасаввур қилибди дейсиз? Кўрар куним бор экан, қайтиб келиб набиралар қуршовида яшаяпман. Мен билан бирга акам ҳам урушга кетган эди. У кўзидан ўқ еди ва уйга қайтгач вафот этди. Урушнинг даҳшатли манзараси, ҳалок бўлган сафдошларимиз, ёниб вайронага айланган завод-фабрикалар, шаҳарлар, бегуноҳ нобуд бўлган ёш болаларни эсласам, юрагим орқага тортади, қизим. Ундай кунлар ҳеч кимнинг бошига тушмасин. Илоҳим, ҳеч қачон урушни кўрманглар, тинчликни қадрига етинглар. Сизлар ўқиб, яхши касб эгаси бўлишларинг учун барча имкониятлар бор. Биз бундай кунларни, ҳаттоки, орзу ҳам қилмас эдик.

Кенжа бобо кўп йиллар халқ хўжалигида, манзилларни обод қилиш йўлида меҳнат қилган. Бугун 8 нафар фарзанд, набираю-эвараларга бош, уларнинг ҳақиқий маслаҳатгўйи. Мардлиги ва матонати, юртга бўлган меҳр-муҳаббати билан барчанинг кўнглидан жой олган, қалбларимизга ғурур-ифтихор бағишлайдиган Кенжа бободек фахрийларимизни қанча эъзозласак оз.

Юртимизда уруш қатнашчилари ва уларга тенглаштирилган шахсларга ғамхўрлик ва ҳурмат эҳтиром кўрсатиш, моддий ва маънавий қўллаб-қувватлаш юзасидан изчил чора-тадбирлар амалга оширилмоқда. Президентимиз фармони билан байрам арафасида иккинчи жаҳон уруши қатнашчилари ва ногиронлар 12 миллион сўм пул мукофоти билан тақдирланди. Қолаверса, ҳукуматимиз томонидан нуронийлар ҳолидан тез-тез хабар олиш, уй-жойларини таъмирлаш ишларига ҳам алоҳида эътибор қаратилмоқда. Суҳбатимиз давомида Кенжа бобо мана шундай эҳтиромдан мамнун эканини кўп бор такрорлади.

— Бизни ғоят ҳурмат-иззат қиляптилар, — дейди қаҳрамонимиз. — Бундай эътибордан бошим кўкка етади. Шунданми, ҳеч ҳам қариганимни ҳис қилмайман. Бахтли юртда яшаса, ёшариб боравераркан одам. Президентимизнинг амалга ошираётган ишларини, бизларни доимий қўллаб-қувватлашини қанча айтсак оз. Улар учун доимо дуодаман. Илоҳим бири минг бўлсин, бола-чақаларининг роҳатини кўрсин. Юртимизда ҳамиша тинчлик бўлсин!

Яхшидан боғ қолади, дейишади. Кенжа бобо каттагина боғ яратиб, унда мевали дарахтлар ва қишлоқ хўжалиги маҳсулотларини етиштиряпти. Ўзининг таъкидлашича, кейинги пайтда бироз кучдан қолиб, кўзи хира тортгани боис боғ ишларини уддалай олмай қолган. Аммо доим назорат қилиб, невараю-эвараларни меҳнатга ўргатади.

Қаҳрамонимиз сингари уруш қатнашчилари билан суҳбатлашсангиз, ҳаётга, ватанга бўлган меҳрингиз янада ортади. Дарвоқе, тинч ва осойишта кунлар учун жонини фидо қилган аждодларимиз хотирасини ёд этиш, сафимизда юрганларини эса эъзозлаш маънавий ҳаётимизнинг ажралмас мазмунидир.

Феруза ЖЎРАЕВА,

журналист