Маълум қилинишича, Давлат хавфсизлик хизматининг Тошкент шаҳар бўйича бошқармаси ходимлари томонидан ИЖҚКД билан ҳамкорликда ўтказилган тадбирда Бектемир тумани солиқ инспекциясининг шўба бошлиғи маҳаллий тадбиркордан пора талаб қилгани аниқланган.

У харидорга савдо чеки берилмагани ҳақида келиб тушган мурожаат юзасидан маъмурий баённома расмийлаштирмаслик ва ишни судга юбормаслик эвазига 4 млн сўм талаб қилган.

Мансабдор ушбу маблағни солиқ инспекцияси инспектори орқали олган вақтида ашёвий далиллар билан қўлга олинган.

Шунингдек, терговга қадар текширув давомида мазкур инспектор жорий йил апрель ойида ҳам худди шу дўкон бўйича келиб тушган мурожаатни кўрмасдан қолдириш эвазига 1,5 млн сўм олгани маълум бўлган.

Ҳозирда мазкур ҳолат юзасидан солиқ органи ходимларига нисбатан жиноят иши қўзғатилиб, тергов ҳаракатлари олиб борилмоқда.