Америкадаги спортга ихтисослашган қатор интернет нашрларининг тарқатган хабарига кўра, жорий йилнинг 28 августида АҚШнинг Калифорния штати Индио шаҳридаги Fantasy Springs Resort Casino бокс аренасида ўтказиладиган профессионал бокс кечасида ҳамюртимиз Бектемир Мелиқўзиев WBA йўналишидаги Continental Americas чемпионлик камари учун мексикалик Алан Кампга қарши рингга кўтарилади.
Бугун Бектемир «Оламспорт» сайтига берган интервьюсида «рақибим профессионал боксда кучли спортчилардан бири саналади. Фаолияти мобайнида 180 га яқин учрашув ўтказган. Профессионал боксдаги 23 та расмий жангнинг 17 тасида ғалабага эришган. Шундан 11 тасида рақибларини муддатидан аввал мағлуб этгани унинг имкониятларини кўрсатиб турибди. Ҳозир мексикалик 28 ёшли боксчининг барча техник-тактик жиҳатларини ўрганиб чиқяпман. Насиб этса, бир ойдан кейин бўладиган баҳсда юртдошларим ишончини оқлайман», дея таъкидлаган.
Афсонавий боксчи Оскар Де Ла Хойяга тегишли "Golden Boy" промоутерлик компанияси ва DAZN ҳамкорлигида ўтказиладиган бокс мусобақасида Мелиқўзиев ва Камп «дуэли»дан ташқари яна 4 та мусобақа ўтказилади.
Украина спорт нашрларининг ёзишича, «ўзбекистонлик Ломаченко» бир ойдан кейин бўладиган жангда иккинчи енгил вазнда (-76,2 кг) профессионал бокс оламига «катта Ўзбек бўрони»ни олиб келади.
Тўлқин РЎЗИЕВ.
