Жорий йил 27 октябрь куни Ўзбекистон Республикаси Сенати Раиси Т.Нарбаеванинг Беларусь Республикаси Миллий Мажлиси Кенгаши раиси Н.Кочанова бошчилигидаги делегация билан учрашуви бўлиб ўтди. Учрашувда томонлар давлат раҳбарларининг яқин ва ишончли алоқалари туфайли иқтисодий, маданий-гуманитар ва бошқа соҳалардаги икки томонлама муносабатлар юқори суръатда эканини эътироф этди.
Жумладан, Т.Нарбаева Ўзбекистон-Беларусь ҳамкорлигининг барча устувор йўналишларини, жумладан, иқтисодий соҳани ривожлантиришда икки мамлакат парламентлари алоҳида ўрин тутишини таъкидлади. Ўз навбатида, Н.Кочанова “Ўзбекистон сўнгги йилларда муболағасиз барча соҳаларда, биринчи навбатда, иқтисодий жиҳатдан жадал ривожланаётган ноёб мамлакат” деб таъкидлади.
Шунингдек, у икки томонлама муносабатлардаги маданий-гуманитар йўналиш, айниқса, таълим йўналиши ҳамда икки мамлакат ёшлар парламентлари ўртасидаги яқин ҳамкорликни ривожлантириш муҳим аҳамиятга эга эканини қайд этди.
Учрашув якунлари бўйича парламентлар ўртасида ҳамкорлик бўйича “Йўл харитаси”ни имзолаш, икки томонлама бизнес-форумларни ўтказиш учун делегациялар таркибига аёллар ишбилармон доиралари вакилларини киритиб, ўзаро парламент ташрифларини ташкил этиш бўйича ҳамкорликни фаоллаштириш юзасидан келишувга эришилди.
Ўзбекистон Республикаси
Олий Мажлиси Сенатининг
ахборот хизмати
