Мақолада таъкидланишича, Белгиянинг Тошкентда дипломатик ваколатхона очиш қарори мамлакатимизнинг Марказий Осиёдаги сиёсий ва иқтисодий аҳамияти ортиб бораётганидан далолат беради. Бу қадам, шунингдек, Европа давлатларининг минтақа билан стратегик алоқаларни мустаҳкамлашга бўлган қизиқиши кучайиб бораётганини кўрсатади.

Белгия Ўзбекистон мустақиллигини 1991 йилда тан олган, икки давлат ўртасида дипломатик муносабатлар эса 1992 йилда ўрнатилган. 1995 йилдан буён Ўзбекистоннинг Брюсселдаги элчихонаси фаолият юритиб келмоқда.

Нашрларда қайд этилишича, Президент Шавкат Мирзиёев томонидан амалга оширилаётган очиқ ва прагматик ташқи сиёсат натижасида Ўзбекистон Европа давлатлари учун муҳим стратегик шерикка айланмоқда. Хусусан, давлат раҳбарининг 2025 йилда Брюсселга ташрифи ҳамда Белгия қироли Филипп билан учрашуви икки мамлакат ўртасидаги ҳамкорликни янада фаоллаштирган.

Иқтисодий алоқалар ҳам изчил ривожланмоқда. Маълумотларга кўра, Ўзбекистон ва Белгия ўртасидаги савдо айланмаси 2020 йилдаги 70 миллион доллардан 2024 йилда 212,7 миллион долларга етган.

Белгиянинг «Picanol» ва «Van de Wiele» компаниялари мамлакатимиз тўқимачилик саноатини модернизация қилишда иштирок этмоқда. Шунингдек, яшил энергетика, логистика, фармацевтика, қишлоқ хўжалиги ва ахборот технологиялари соҳаларида ҳам ҳамкорлик кенгайиб бормоқда.

Муаллифлар фикрича, Белгиянинг Тошкентда элчихона очиши нафақат дипломатик воқеа, балки Ўзбекистоннинг Марказий Осиёдаги стратегик ўрни ва Европа билан иқтисодий ҳамда геосиёсий интеграциядаги аҳамиятининг эътирофи ҳисобланади.