Агентлик прогнозларига кўра, демократлар Сенатда 54 та, Вакиллар палатасида эса 232 та ўринга эга бўлишди, республикачилар эса мос равишда 44 та ва 139 та ўринни қўлга киритишди.
Айни пайтда юқори ва қуйи палаталар Республикачилар партияси назоратида бўлиб, унда мос равишда 53 ва 219 ўрин мавжуд.
АҚШ Президенти Дональд Трамп оралиқ сайловлар натижаларини тан олишга ва демократлар билан ҳамкорлик қилишга тайёрлигини билдирди. У республикачиларнинг муваффақиятлироқ натижа кўрсатишига умид қилган эди ва мағлубият сабабларини Эрон билан боғлиқ зиддият туфайли бензин нархининг ошгани билан изоҳлади. Шу билан бирга, Оқ уй раҳбари партиянинг муваффақиятсизлигини унинг шахсий мағлубияти сифатида баҳолаш фикрини рад этди.
Кеча Қўшма Штатларда овоз бериш жараёни бўлиб ўтди. Сайловчилар Вакиллар палатасининг барча 435 аъзоси, шунингдек, Сенатдаги 100 ўриндан 35 таси учун овоз беришди, деб хабар берди ria.ru.
Конгресс устидан назорат демократларга Трампнинг қонунчилик ташаббусларини тўсиб қўйиш, унинг маъмурияти фаолиятини текшириш ва давлат харажатларини чеклаш имконини беради. Сенатдаги кўпчилик ўринлар уларга Президент томонидан давлат лавозимларига кўрсатилган номзодларни тасдиқлашга йўл қўймаслик ваколатини ҳам тақдим этади.
Сайлов кунидан олдин президент бундай натижага тайёр эканлигини айтиб, бу Америка сиёсатида тез-тез учраб турадиган ҳолат эканлигини таъкидлаган эди.
