2021 йил 7 январь: ҳукумат Токио ва унга ёндош айрим ҳудудлар учунгина қисман карантин жорий қилди. Яъни, барча корхоналар аввалгидек ишлайди, фақатгина умумий овқатланиш жойлари ва барлар (“изакая”)нинг фаолияти узоғи кечги 8 гача этиб белгиланди. Ички туризмга доир барча имтиёзлар вақтинчалик тўхтатилди.
2021 йил 23 февраль - Токиода коронавирус билан боғлиқ кунлик ҳолат ўртача 2500 тадан - 300 тага тушди.
Бу қарорда асосий “фишка” - пандемиянинг олдини олиш бўйича мустақил экспертлар кенгашининг ролидадир. Айнан улар вазиятга тўғри баҳо бера олди. Жумладан, коронавирус кўпайишининг асосий ўчоғи кечки кўнгилочар масканлар (ресторан, бар ва тунги клублар) эканлигини исботлай олишди. Ҳамда тўлиқ фавқулодда ҳолат жорий этишга эҳтиёж йўқлигини кўрсата билишди.
Экспертларнинг таҳлилий қобилиятини “бирор касаллик учун айнан керакли нуқтага керакли дозада малҳам юбора олиш”га қиёслаш мумкин.
Нима учун ҳукумат экспертлар фикрига қулоқ солишга мажбур?
Биринчидан, экспертларнинг таҳлиллари доимий равишда ОАВ да айланиб туради, асосланган таклифларни ҳеч бир раҳбар осонгина рад қила олмайди.
Иккинчидан, экспертлар кенгаши аъзоларига сиёсатчи ёки бошқарувчилар эмас, нуфузли олий таълим ва тадқиқот марказларининг аниқ соҳа бўйича вакиллари (профессорлар, тадқиқотчилар) киритилган.
Эътиборлиси шундаки, Японияда барча олий таълим муассасалари ва тадқиқот марказлари ҳукуматдан мустақил ҳисобланади. Яъни, уларда у ёки бу вазирликка вертикал бўйсунув йўқ. Шунинг учун ҳам экспертлар ўз таҳлилини ташқи тазйиқларсиз амалга ошира олишади.
Учинчидан, тадқиқотчиларнинг жамиятдаги ўрни юқори эканлиги. Жамият муаммоли вазият бўйича сиёсатчиларнинг олди-қочди гапларидан кўра кўпроқ ушбу соҳа илмий мутахассисларининг фикрига ишонишади. Япония Бош вазирининг деярли ҳар бир қарорни эълон қилишда “экспертлар фикрига асосланган ҳолда” деган жумлани қўшиб ишлатиши ҳам бежиз эмас.
