Дори воситалари ва тиббий асбоб-ускуналарни назорат қилиш агентлиги (MHRA) молнупиравирни симптомлар бошланганидан кейин беш кун ичида ёки CОVID-19 учун тест мусбат натижа берганидан кейин имкон қадар тезроқ фойдаланишга рухсат берди.
Препарат Буюк Британияда Lagevrio номини олди. Ўтган ойда ўтказилган тадқиқотларга кўра, препарат коронавируснинг оғир турига чалинганларда касаллик ривожланиши, ўлим ёки касалхонага ётқизилиш хавфини икки баравар камайтириши мумкин.
Буюк Британия ҳукумати ва мамлакатнинг Миллий соғлиқни сақлаш хизмати (NHS) препаратга доир тавсияларни беморларга ўз вақтида беришини эълон қилди.
Ўтган ой Буюк Британия ва АҚШ компанияси 480 000 даволаш курси учун молнупиравир етказиб берилишига келишиб олди. Компания алоҳида баёнотда шу йил охиригача 10 миллион ва 2022 йилда камида 20 миллион даволаш курси учун дори етказишни режалаштираётганини айтди. Merck ҳар бир мамлакатнинг молиявий имкониятларини ҳисобга олган ҳолда, босқичма-босқич нархлаш ёндашувини қўллашини маълум қилди.
Merck аввалроқ AҚШ ва Европа регуляторларига COVID-19 таблеткаларини ишлатиш учун рухсат олиш мақсадида мурожаат қилганди. AҚШ ҳукумати аллақачон 1,2 миллиард долларга 1,7 миллион даволаш курси учун молнупиравирни олдиндан сотиб олганди. Aвстралия, Сингапур ва Жанубий Корея ҳам ушбу препаратни сотиб олиш бўйича шартнома имзолаган.
