Chevrolet бренди Қозоғистон бозорида етакчи мақомларни ишғол қилишда давом этмоқда. Ўтган ойда Chevrolet октябрда энг кўп сотилган брендлар ичида биринчи ўринни эгаллаганди, шунингдек, UzAuto Motorsнинг икки модели – Nexia ва Cobalt ойнинг энг кўп сотилган моделлари рейтингида иккита энг юқори ўринни эгаллади.
Қозоғистон бозорида тақдим этилган автомобилларнинг кенг танлови Chevroletга энг муваффақиятли брендлар рейтингида биринчи ўринни эгаллаш ва Hyundai, Lada, Toyota ва KIA кабилардан дадил ўзиб кетишга тўсқинлик қила олмади.
Chevrolet брендининг бозордаги улуши тобора ортиб бораётган Қозоғистондаги сотувлар динамикасидан келиб чиқиб, UzAuto Motors ўзбек автомобилларига қозоғистонлик харидорларнинг ишончи қатъий ортиб бораётганлигини қайд этишдан мамнун. Агар жорий йил январь ойида маҳаллий автоишлаб чиқарувчининг бозордаги улуши 12,5%ни ташкил қилган бўлса, октябрда бу кўрсаткич 28,1%га етди.
Ўтган ойда Қозоғистонда жами 8 637 дона енгил автомобиль сотилган бўлиб, уларнинг 2 430 таси UzAuto Motorsда ишлаб чиқарилган.
