Биринчи битим Ўрмон агентлиги директори Эркин Муҳиддинов ҳамда Хитойнинг Нинся ўрмон хўжалиги ва яйловлар бошқармаси раҳбари Ву Сяруй ўртасида имзоланди.

Ҳужжатга мувофиқ, иҳота ўрмонлари барпо этиш орқали ҳудудларнинг яшиллик даражасини ошириш, замонавий кўчатхоналар ва оналик плантацияларини ташкил этиш, барқарор ўрмон хўжалиги ҳамда яшил саноатни ривожлантириш бўйича қўшма лойиҳалар амалга оширилади.

Шунингдек, сув ресурсларидан оқилона фойдаланиш, деградацияга учраган ерларни тиклаш, тупроқ шўрланишининг олдини олиш ва экотизимларни босқичма-босқич мустаҳкамлаш йўналишларида ҳам ҳамкорлик йўлга қўйилади.

Томонлар ҳамкорлик лойиҳаларини тизимли ташкил этиш, уларга соҳа мутахассисларини жалб қилиш ҳамда молиялаштириш имкониятларидан самарали фойдаланиш масалаларига алоҳида эътибор қаратди.

Шундан сўнг Ўрмон агентлиги директори Эркин Муҳиддинов ҳамда Хитойнинг «Yinchuan Wolsenn Modern Irrigation Co., Ltd» компанияси директорлар кенгаши раиси Чен Лин иштирокида яна бир ҳамкорлик битими имзоланди.

Унга кўра, хитойлик ҳамкорлар Ўзбекистонга сувни тежовчи суғориш технологиялари — фертигация намойиш тизимларини етказиб беради ҳамда маҳаллий мутахассислар учун мазкур технологиялар бўйича мунтазам ўқув курсларини ташкил этади. Лойиҳанинг умумий қиймати қарийб 110 минг юанни ташкил этади.

Мутахассисларнинг таъкидлашича, фертигация — суғориш суви ва ўсимлик учун зарур минерал ўғитларни ягона тизим орқали бир вақтнинг ўзида ўсимлик илдизига етказиб бериш технологиясидир. У асосан томчилатиб суғориш тизимлари билан қўлланилади ва ўғит сарфини 20–50 фоизгача қисқартириш, озуқа моддаларини бевосита илдизга етказиш ҳамда суғориш ва ўғитлаш жараёнларини автоматлаштириш имконини беради.

Қайд этилишича, мазкур технологияларнинг жорий этилиши мамлакатимизда янги ўрмонлар барпо этиш ва чўлланишга қарши курашиш тадбирлари самарадорлигини сезиларли даражада оширади.

Маълумот учун, 2025 йилда Ўрмон агентлиги ва Хитой ҳамкорлигида Арнасой, Кармана, Муборак, Қоракўл ва Нукус туманларида галофит ўсимликлари боғлари ташкил этилди. Шунингдек, Хитойдан 1,4 минг тонна галофит ўсимликлари уруғи олиб келиниб, улардан кўчат етиштириш ишлари бошланган.

Бундан ташқари, жорий йилдан бошлаб Ўрмон агентлиги ва Хитойнинг «Sinoway Forest» компанияси ҳамкорлигида амалга оширилаётган «Зарарли углеродларни ютувчи ўрмон хўжалигини ривожлантириш ва экотизимларни тиклаш» лойиҳаси доирасида Сурхондарё вилоятида 5 минг гектар пистазор барпо этилмоқда.