Бу ҳақда Ўзбекистон Президентининг Наманган шаҳрида «Янги Наманган шаҳарчаси» замонавий ишбилармонлик маркази ва турар жойлар комплексини барпо этиш чора-тадбирлари тўғрисида»ги қарорида маълум қилинди.
Ушбу ҳужжат билан Наманган шаҳрининг меъморий қиёфасини янада яхшилаш ва ободонлаштириш, хорижий ва маҳаллий инвесторлар учун жозибадорлигини ошириш, шунингдек, шаҳарнинг туризм салоҳиятидан самарали фойдаланиш, туристик инфратузилмаларни жадал ривожлантиришни таъминлаш вазифалари тасдиқланди.
Қарорда Наманган вилояти ҳокимлиги ҳузурида «Янги Наманган шаҳарчаси» замонавий ишбилармонлик маркази ва турар жойлар комплексини барпо этиш» дирекцияси (Дирекция) ташкил этилиши таъкидланган.
Давлатмиз раҳбарининг қарорига мувофиқ, Янги Наманган шаҳарчасини барпо этиш учун Наманган шаҳри Давлатобод туманининг "Юксалиш" ва "Орзу" маҳаллалари, Тўрақўрғон туманининг "Еттикон", "Ибрат" ва "Парасмон" маҳаллаларининг туташ ҳудудларидан 1203 гектар ер майдони ажратилади.
Янги Наманган шаҳарчаси ҳудудидаги умумий фойдаланишдаги ер участкалари инфратузилма объектлари ва ижтимоий аҳамиятга эга объектларни барпо этиш учун Дирекцияга доимий фойдаланиш ҳуқуқи билан ажратилади.
Тадбиркорлик ва шаҳарсозлик фаолиятини амалга ошириш учун, шу жумладан, кўп квартирали уйлар, ишлаб чиқариш, савдо ва хизмат кўрсатиш объектларини қуриш учун мўлжалланган ер участкалари эса белгиланган тартибда электрон онлайн-аукцион орқали реализация қилинади.
Қарорда шаҳарчани барпо этиш мақсадида ер участкалари давлат ва жамоат эҳтиёжлари учун олиб қўйилиши муносабати билан жисмоний ва юридик шахсларга етказилган зарар қонунчилик ҳужжатларида белгиланган тартибда тўлиқ қопланиши қайд этилган.
Янги Наманган шаҳарчаси ҳудудида ер участкаларини электрон онлайн-аукцион орқали сотишдан тушган тушумлар Дирекцияга ўтказилади ва Янги Наманган шаҳарчасини барпо этиш ишларига сарфланади.
Шунингдек, ҳужжатда «Янги Наманган шаҳарчаси» замонавий ишбилармонлик маркази ва турар жойлар комплексини барпо этиш ишларини мувофиқлаштириш ва инвестиция лойиҳаларини кўриб чиқиш бўйича ишчи гуруҳи тузилиши белгиланди.
Ишчи гуруҳ Янги Наманган шаҳарчасининг бош режасини ҳамда ҳудудларини батафсил режалаштириш лойиҳаларини кўриб чиқиш, шаҳарчани тасдиқланган шаҳарсозлик ҳужжатлари асосида барпо этиш бўйича комплекс чора-тадбирларни амалга ошириш, Дирекция фаолиятини, давлат ва корпоратив харидлар очиқлик ва шаффофлик тамойиллари асосида ўтказилишини ҳамда уларнинг назоратини таъминлаш ва бошқа ишларни мувофиқлаштиради.
Қарорда, шунингдек, Янги Наманган шаҳарчасини барпо этишнинг молиялаштириш манбалари аниқ белгиланди.
