Мамлакатимизнинг Сеулдаги элчихонаси «Ўзелтехсаноат» уюшмаси раисининг биринчи ўринбосари Мансур Ҳошимов билан «Dong-A Electric» компанияси катта ижрочи директори Ким Те У ўртасида видеоконференция шаклида музокара ўтказилди.
Музокаралар давомида томонлар Жанубий Кореянинг «Dong-A Electric» компанияси иштирокида Ўзбекистонда замонавий электротехника маҳсулотларини ишлаб чиқариш лойиҳасини рўёбга чиқаришнинг амалий жиҳатлари муҳокама қилинди.
Ким Те У «Dong-A Electric» ҳар хил турдаги замонавий электротехника маҳсулотлари, шу жумладан соҳада ақлли ечимларни ишлаб чиқаришини таъкидлади. У ўз компаниясининг Тошкентда экспортга йўналтирилган рақобатбардош электротехника маҳсулотларини ишлаб чиқаришга йўналтирилган лойиҳасини амалга оширишга қизиқиш билдираётганини, шунингдек, «Dong-A Electric» компанияси Ўзбекистонда юқори қўшимча қийматга эга тайёр маҳсулотлар ишлаб чиқаришни йўлга қўйиш учун ўзининг замонавий технологияларини тақдим этишга тайёр эканлигини тасдиқлади.
Ушбу ишлаб чиқаришни ташкил этиш учун Ўзбекистонда барча шароит — бой хомашё базаси, юқори малакали мутахассислар, қулай инвестиция муҳити, мамлакат ва қўшни давлатларда талабгор бозор мавжудлиги таъкидланди.
Томонлар фаол ахборот алмашишни давом эттириш ва навбатдаги музокараларни онлайн шаклда ўтказиш бўйича келишувга эришди, деб хабар беради Хорижий инвестицияларни жалб этиш агентлиги матбуот хизмати.
