Кеча кўҳна қитъада Европа Чемпионлар лигаси иккинчи тур ўйинлари бошланди. Турнинг асосий учрашувларидан бири Германияда бўлиб ўтди. Мюнхенда “Бавария” “Барселона”ни қабул қилди. Қизғин курашлар остида ўтган баҳсда немислар 2:0 ҳисобида ғалаба қозонди. Жорий йилда “Бавария”дан “Барселона”га ўтган Роберт Левандовски ҳам Испания клубига ёрдам бера олмади.
Ўйиндан сўнг “Барселона” бош мураббийи Хави “Marca” нашри мухбирига ўйин ҳақидаги ўз фикрларини билдирди:
“Биз “Бавария”дан яхшироқ эдик, — деди у. — Рақибни ҳаддан ташқари кўп кечирдик, аммо улар бизни кечирмадилар – фарқ шунда. Бизда олти-еттита голли вазиятлар бўлди, аммо тўп киритишнинг уддасидан чиқа олмадик.
Биринчи бўлим бутунлай биз устунликка эришдик. Натижа беллашувда нима бўлганини акс эттирмайди. Лекин бу – Чемпионлар лигаси. Агар рақибни кечирсанг, бунинг учун товон тўлайсан...”
Иккинчи турнинг қолган ўйинлари қуйидаги натижалар билан тугади:
“Виктория” Пльзень – “Интер” 0:2
“Спортинг” – “Тоттенҳэм” 2:0
“Байер” – “Атлетико” 2:0
“Ливерпуль” – “Аякс” 2:1
“Марсель” – “Айнтрахт” 0:1
“Порту” – “Брюгге” 0:4
