Шу йилнинг 4 апрель куни соат 16:15 да номаълум аёл Покистоннинг Ўзбекистондаги элчихонаси хавфсизлик постидаги “Қўриқлаш” бош бошқармасининг хорижий давлатларнинг дипломатик ваколатхоналарини қўриқлаш бўйича алоҳида батальони телефон рақамига қўнғироқ қилди.
Ўзини шифокор деб таништирган аёл қизи йўл-транспорт ҳодисасида жароҳат олгани, жарроҳлик амалиётини ўтказиш учун зудлик билан 20 минг АҚШ доллари олиб келиши кераклиги сўради.
Қўнғироққа жавоб берган “Қўриқлаш” хизмати ходими фирибгарлар қўнғироқ қилаётганини дарҳол англаб, уларни қўлга олиш мақсадида “қизини қутқариш учун” учрашишга ва пул беришга тайёрлигини билдиради. Аёл Покистон элчихонаси яқинида учрашув белгилайди, лекин у пулни олиб кетиш учун ўрнига Руслан исмли танишини юборди.
Хавфсизлик постининг расмий телефон рақамига қўнғироқ қилган Руслан жароҳатланган қизнинг отасини кутаётганини айтади. Фирибгар учрашув белгиланган жойда ходимлар томонидан қўлга олиниб, Яккасарой тумани ички ишлар бўлимига олиб борилди. Фуқаронинг шахси текширилганда, у аслида Чилонзор туманида яшовчи Самандар исмли 23 ёшли фуқаро экани аниқланди.
Айни пайтда Тошкент шаҳар ИИББ томонидан терговга қадар суриштирув ишлари олиб борилмоқда. Қайд этилишича, суриштирув давомида унинг шериги аниқланади, шунингдек, бошқа шу каби жиноятларга алоқадорлиги текширилади.
