Унда Сенатнинг навбатдаги ялпи мажлиси кун тартибига киритилган қонунлар ва бошқа масалалар муҳокама қилинди. Хусусан, Қўмита томонидан муҳокамага олиб чиқилаётган «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги ва «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунлар ҳам кўриб чиқилди.
Кўпдан буён ер участкаларини жамоат эҳтиёжлари учун олиб қўйишда жисмоний ва юридик шахсларнинг мулкий ҳуқуқларини кучайтириш масаласини қонун даражасида ҳал этиш долзарб масала сифатида кўтарилмоқда.
Шунингдек, ер участкаси ёки унинг бир қисмини жамоат эҳтиёжлари учун олиб қўйишнинг аниқ тартиб-таомиллари ва механизми амалдаги қонунчиликда ҳам аниқ белгиланмаганлиги бир қанча эътирозларга сабаб бўлмоқда.
Ушбу омиллар инобатга олинган ҳолда Қонунда жисмоний ва юридик шахсларнинг ер участкаси ёки унинг бир қисми жамоат эҳтиёжлари учун олиниши натижасида ер ва ундаги кўчмас мулклар учун компенсация тўлаш тартиб-таомиллари белгиланмоқда. Компенсация эвазига ер участкаси жамоат эҳтиёжлари учун олиб қўйилиши асос бўладиган ҳолатлар рўйхати аниқ қилиб кўрсатилган. Рўйхатга киритилмаган сабаблар билан ер участкаларини жамоат эҳтиёжлари учун олиб қўйиш сифатида талқин этиш тақиқланмоқда.
Қонунга мувофиқ олиб қўйилган ер участкасида ўзбошимчалик билан қурилган турар жойлар, ишлаб чиқариш ҳамда бошқа бинолар ва иншоотлар бозор қиймати тўлиқ ҳажмда қопланади.
Кундалик ҳаётда ушбу ҳолат билан боғлиқ бир қатор муаммолар ҳам ўзининг қонуний ечимини топмоқда.
Бундан ташқари, Қўмита мажлисида Ўзбекистон Республикаси Давлат бюджетининг 2021 йил ва 2022 йил биринчи чораги якунлари бўйича ижроси тўғрисидаги ҳисоботлар муҳокама қилинди.
Таъкидлангандек, 2021 йилда дунё бўйича кўпчилик мамлакатларнинг иқтисодиётларида тикланиш жараёни кузатилган, жумладан 2021 йил якуни билан ўз вақтида оқилона олиб борилган фискал ва монетар сиёсат натижасида Ўзбекистон иқтисодиёти 7,4 фоизга ўсиб, ЯИМ ҳажми 734 триллион 600 миллиард сўмни ёки 69,2 миллиард долларни ташкил этган, шунингдек, 2022 йилнинг I чорагида ЯИМ 5,8 фоизга ўсган.
Бундан ташқари, ялпи қўшилган қиймат 2021 йилда 7,5 фоизга кўпайиб, 681 трлн 400 миллиард сўмни ташкил этган.
Шунингдек, 2021 йилда Ўзбекистон ташқи савдо айланмаси 2020 йилга нисбатан 16,0 фоизга ўсиб, 42,1 миллиард долларни ташкил этган.
Давлат бюджети даромадлари 2021 йилда 164 триллион 800 миллиард сўмни ташкил этиб, белгиланган 147 триллион 700 миллиард сўм прогноз 111,6 фоизга ёки 17 трлн 100 миллиард сўмга ошириб бажарилган, 2020 йилга нисбатан эса 31 триллион 900 миллиард сўмга ўсган.
2022 йилнинг I чорагида Давлат бюджети даромадлари белгиланган 39,1 триллион сўм прогнози амалда давлат мақсадли жамғармаларисиз 41,9 триллион сўмга ёки 2,8 триллион сўмга (107,2 фоиз) ошириб бажарилган. Даромадлар ўтган йилнинг мос даврига нисбатан 8 триллион сўмга кўпайган.
Шу билан бирга, Давлат бюджети даромадлари ўсишига сўнгги йиллардаги солиқ сиёсатининг ўзгартирилиши, илгари берилган солиқ имтиёзларининг бекор қилиниши, иқтисодиёт секторларида олиб борилаётган ислоҳотлар ҳисобига солиқ базасининг кенгайтирилиши таъсир кўрсатгани алоҳида таъкидлаб ўтилди.
Мажлис якунлари бўйича Қўмитанинг тегишли қарори қабул қилинди.
Ўзбекистон Республикаси Олий Мажлиси Сенати Ахборот хизмати.
