Регуляторнинг фикрича, Paxlovid билан даволаш COVID-19нинг оғир шаклига олиб келиши мумкин бўлган камида битта асосий касаллиги мавжуд беморларнинг касалхонага ётқизилиши ёки ўлим сонини сезиларли даражада камайтиради.
Тадқиқот натижаларига кўра, 5 кун давом этган Paxlovid билан даволанишдан сўнг бир ой ичида беморларнинг атиги 0,8 фоизи 24 соатдан кўпроқ вақтга касалхонага ётқизилган. Шу билан бирга, ўрганиш жараёнида плацебо олган беморлар орасида касалхонага ётқизилганлар улуши 6,3 фоиздан юқори эканлиги маълум бўлди.
Бундан ташқари, мазкур дорини қабул қилган беморлар гуруҳида ўлим кузатилмади, плацебо гуруҳида эса 9 киши вафот этди.
Регуляторнинг таъкидлашича, тадқиқот натижалари коронавируснинг “дельта” штамми билан боғлиқ, аммо препарат “омикрон” ва бошқа вариантларга қарши ҳам фаол бўлиши кутилмоқда, дейилади агентлик сайтида берилган хабарда.
