Европа Иттифоқида эмлаш кампанияси якшанба кунидан расман бошланди. Аммо, Euronews маълумотларига кўра, ҳозирча вакциналар кам ва биринчи навбатда энг заиф қатлам: кекса фуқаролар ва коронавирус билан ишлайдиган шифокорлар эмланмоқда.
Европада Американинг Pfizer фармацевтика компанияси ва Германиянинг BioNTech препаратидан фойдаланилмоқда. Ушбу вакцина билан аллақачон дунё бўйлаб бир ярим миллионга яқин одам эмланган.
Сиёсатчилар бутун Европа Иттифоқи бўйлаб бир вақтнинг ўзида эмлашни ташкил қилиш — ишлаб чиқариш, сақлаш ва қатъий ҳароратда етказиб бериш каби улкан тадбирнинг муваффақиятли ўтказилишини эълон қилишмоқда.
Шунингдек, улар вакцина барча фуқаролар учун бепул бўлиши, ҳеч ким эмланишга мажбур қилинмаслигини ваъда қилмоқда. Зеро, ҳамманинг ҳам эмланишга хоҳиши йўқ. Масалан, Руминияда ўтказилган сўровларга кўра, вакцинага ишонмайдиган, ножўя таъсирларидан қўрқадиган ёки шунчаки зарур деб ҳисобламайдиган фуқароларнинг учдан бир қисми эмланишни хоҳламаяпти.
