«Uzbekistan Airways» авиакомпанияси томондан ташкил этилган мазкур чартер рейс бортидан Германия, Швеция, Швейцария, Чехия, Буюк Британия, Испания, Италия, Норвегия ва Бельгия бўлб турган 200 нафар талаба, сайёҳлар, қариндошларининг уйларида вақтинча бўлиб турган юртдошларимиз, шунингдек юртимиздаги турли ишлаб чиқариш коорхоналарининг хорижий мутахассислари жой олди.
Белгиланган қоидаларга мувофиқ барча йўловчилар 14 кунлик карантинни махсус муассасаларда ёки ўз хоҳишига биноан Тошкент шаҳридаги меҳмонхоналарда ўтказади, деб хабар бермоқда «Дунё» АА мухбири.
Таъкидлаш керак-ки, Франкфурт-Тошкент йўналишида бундан аввал ташкил этилган чартер рейс билан 170 нафар юртдошимиз Ватанга қайтарилган эди.
Ўзбекистон Республикасининг Германия ва Бенилюкс давлатларидаги дипломатик ваколатхоналари Европа давлатлари ҳудудида доимий ва вақтинчалик яшаётган фуқароларимизга пандемия даврида имкон қадар қулай шарт-шароитлар яратиш доирасида тегишли ишларни фаол давом эттирмоқда.
Ўз навбатида, COVID-19 билан боғлиқ вазиятнинг яқин келажакда яхшиланиши ва Тошкент-Франкфурт-Тошкент ҳаво қатновининг қайта тикланишига умид қилган ҳолда Германиядан Ўзбекистонга ташкил қилинадиган навбатдаги чартер рейсларга рўйхатга туриш бўйича Берлин шаҳридаги элчихона ёки Франкфурт-Майн шаҳридаги Бош консулхонага, шунингдек, Ўзбекистаннинг Брюсселдаги (Бельгия) элчихонасига мурожаат қилиш мумкинлигини яна бир бор эслатиб ўтамиз.
Консуллик ходимларининг алоқа учун маълумотларни дипломатик ваколатхоналаримизнинг веб-сайтларидан олишингиз мумкин.
