Ушбу ҳафталик доирасида “Маҳалла” ҳайрия жамоат фонди Хоразм вилоят бўлими ҳам кекса авлод вакилларига эътибор ва ғамхўрликни кучайтириш, уларнинг турмуш шароитини яхшилаш, мазмунли ҳаёт кечиришларини таъминлаш, бой ҳаётий тажрибаларидан кенг фойдаланишга қаратилган бир қатор маънавий-маърифий тадбирларни ўтказиб келмоқда.
Жумладан, Боғот туманидаги Миришкор қишлоғида жойлашган 4-сон мусиқа ва санъат мактабида ўтказилган тадбирда кекса авлод вакиллари ёшларга ўз ҳаёт йўллари ҳақида сўзлаб бердилар. Берилган саволларга кексалар ўз ҳаётий тажрибаларидан келиб чиқиб жавоб беришди.
Тадбирда туман маданият уйи санъаткорлари иштирокида катта концерт дастури намойиш қилинди. Барча фахрийларга эсдалик совғалари топширилди.
Бундай тадбирлар бошқа маҳаллалар, корхона ва ташкилотларда ҳам бўлиб ўтмоқда.
Рўзимбой ҲАСАН,
“Янги Ўзбекистон” мухбири
