Ҳудудлараро ўзаро ҳамкорлик алоқаларини мустаҳкамлаш учун Россия Федерациясига борган Фарғона вилояти ҳокимининг ўринбосари Иқболжон Эргашев бошчилигидаги вилоят делегацияси ўз ташрифини Курган областидан бошлади.
Фарғона вилояти делегацияси икки кун давомида Курган интеграциялашган технологиялар заводи, Варгашинский ёнғинга қарши ва махсус техника заводи, қурилиш материаллари ишлаб чиқаришга мўлжалланган «ЛесСервис» МЧЖ ҳамда Кетовский туманида жойлашган фермер хўжалиги фаолияти билан яқиндан танишди.
Дастлаб, Курган интеграциялашган технологиялар заводи фаолияти билан танишилди.
Завод 2001 йилдан бери фаолият юритиб келади, ҳозирда Россиянинг энергетика ва саноат машинасозлиги бозорида етакчилардан бири ҳисобланади.
Ишлаб чиқарилаётган маҳсулотлар қаторига газ поршенли ва дизель двигателлари, газ кучайтиргич ва компрессор станциялари, электр блоклари, қаттиқ маиший чиқиндиларни модулли конструкцияда қайта ишлаш ва утилизация қилишга мўлжалланган ускуналар киради.
Завод директорига «Қўқон» эркин иқтисодий зонаси ҳақида маълумот берилди ва Фарғона вилоятига ташриф буюриб, ушбу зона имкониятлари билан танишиш таклиф қилинди.
Кейинги манзил «Варгашинский ёнғинга қарши ва махсус техника заводи» бўлди. Корхона раҳбари Владимир Казаков меҳмонларга завод фаолияти, хизмат турлари, ишлаб чиқаришдан тортиб, буюртмачига етиб боргунга қадар бўлган жараёнлар ҳақида батафсил маълумотлар бериб ўтди.
Ишлаб чиқаришни диверсификация қилиш доирасида «Варгашинский ёнғинга қарши ва махсус техника заводи» танкерларни таъмирлаш, қисмларни алмаштириш, тизимларни модернизация қилиш, ёнғинга қарши насосларни ишлаб чиқариш, сотиш ва ўрнатиш, танкерларни изоляциялаш, муҳрлаш, бўёқ ишларини тиклаш, қўшимча коррозияга қарши қоплама ва бошқа хизматларни кўрсатади. Корхона йилига 350 тагача ёнғинга қарши танкер ишлаб чиқариш имконини беради.
Шу куни Кетовский туманида жойлашган 25 минг гектар майдонда ташкил этилган зотдор от, чорва мол-қўйлари боқилаётган фермер хўжалиги ҳамда ҳар бирида 5 минг донадан сосна кўчатлари етиштирилаётган иссиқхона билан ҳам танишилди.
Бугун делегация аъзолари Курган вилоятининг инвестицион ва экспорт салоҳияти тақдимоти билан танишади ҳамда Курган корхоналари вакиллари билан учрашув ва музокаралар ўтказилиши режалаштирилган, деб хабар беради Фарғона вилоят ҳокимлиги матбуот хизмати.
